Rasijskaha dypłamata, jaki raniej pracavaŭ u pasolstvie ZŠA i byŭ zavierbavany, asudzili na 12 hadoŭ za zdradu dziaržavie
Paśla zvalnieńnia z MZS dypłamat Arsienij Kanavałaŭ pracavaŭ u «Raskosmasie».
Arsienij Kanavałaŭ. Fota: «Ahienctva»
Maskoŭski haradski sud prysudziŭ da 12 hadoŭ kałonii strohaha režymu 42‑hadovaha byłoha supracoŭnika MZS Rasii Arsienija Kanavałava, paviedamili ŭ Centry hramadskich suviaziaŭ FSB.
Pavodle danych siłavikoŭ, Kanavałaŭ padčas doŭhaterminovaj kamandziroŭki ŭ ZŠA «za hrašovaje ŭznaharodžańnie inicyjatyŭna pieradaŭ amierykanskaj raźviedcy sakretnyja źviestki, jakija stali viadomyja jamu pa słužbie».
Paśla zvalnieńnia z MZS były dypłamat pracavaŭ u «Raskosmasie».
Pavodle infarmacyi rasijskich ŚMI, Kanavałava zatrymała FSB 28 sakavika 2024 hoda. Rasijskija śpiecsłužby daviedalisia pra jaho dziakujučy svaim ahientam u raźviedsupolnaści ZŠA.
Paviedamlałasia, što Kanavałaŭ byŭ zavierbavany CRU padčas pracy druhim sakratarom konsulstva Rasii ŭ Chjustanie (Techas) z 2014 pa 2017 hady.
Paśla naviny ab prysudzie FSB apublikavała videa zatrymańnia Kanavałava ŭ sałonie mikraaŭtobusa. Na hetych kadrach u mužčyny siłaviki pytajucca, ci viedaje jon, što adbyłosia, jon adkazvaje «nie».