26‑hadovy Andrej pajechaŭ u Rasiju ŭ marski fłot. Ale trapiŭ na vajnu i zahinuŭ — maci kaža, spakusiŭsia vialikimi hrašyma

Uradženiec Łuninca Andrej Harhun źjechaŭ u Rasiju, pavieryŭšy ŭ abiacańni pracy na «Kaśpijskim marckim fłocie», ale apynuŭsia ŭ šerahach najmitaŭ i zahinuŭ. Jahonaja maci śćviardžaje, što syna padmanuli, adnak pryznaje: hałoŭnaj pryčynaj pajezdki stali «vialikija hrošy, jakija jon vielmi lubiŭ».

Andrej Harhun u armii. Fota: Ukantakcie

Andreju Harhunu na momant śmierci było 26 hadoŭ. Jon rodam z Łuninca. U 2014 hodzie chłopiec skončyŭ miascovuju prafiesijna-techničnuju vučelniu №160 (siońnia — Kaledž sielskahaspadarčaj vytvorčaści). U listapadzie 2017‑m jaho zabrali ŭ vojski SSA, adkul jon vyjšaŭ na dembiel u mai 2019-ha.

Pra hibiel syna napisała jahonaja maci Valancina Harhun u Adnakłaśnikach. Pavodle jaje słoŭ, 23 śniežnia 2025 hoda była hadavina z dnia jahonaj śmierci — heta značyć, što Andrej zahinuŭ u kancy 2024 hoda. Žančyna nastojvaje, što chłopiec jechaŭ «nie na vajnu», a realizoŭvać dziciačuju maru pra marskuju piachotu.

«A tam, ja dumaju, zahrabli. Jany jeduć nie zabivać, a pamirać. Vyžyvać tam nie dajuć», — narakaje žančyna.

U tym ža dopisie maci pryznajecca ŭ finansavaj matyvacyi: «Asnoŭnaja pryčyna vajny — heta vialikija hrošy. Jak ubačyła ličby, mnie samoj zachaciełasia pajechać». Praŭda, jana śćviardžaje, što abiacanych vypłat ad rasijskaha boku svajakam damahčysia niemahčyma.

Andrej Harhun. Fota ź jahonaj staronki Vkontaktie

Maci zahinułaha narakaje na adsutnaść dziaržaŭnych abmiežavańniaŭ, jakija mahli b vyratavać jaje syna. Na jejnuju dumku, pamyłka ŭładaŭ u tym, što «ad pačatku nie nakłali zabaronu na vyjezd u Rasiju», dziakujučy čamu moładź mahła b zastacca žyvoj.

«Jak ubačyła ličby, mnie samoj zachaciełasia pajechać. Nie dziŭna, što moładź nie moža ŭtrymacca. Najbolšaja spakusa — vialikija hrošy, jakija moj syn vielmi lubiŭ. A vialikija hrošy prynosiać vialikuju biadu», — piša jana.

Užo vydaleny kamientar Valanciny Harhun. Skrynšot z supołki

Ciapier žančyna sprabuje pieraścierahčy inšych i raskazvaje pra niemahčymaść atrymać kampiensacyju paśla śmierci syna. Praŭda, u vyniku svaje kamientary ŭ Adnakłaśnikach jana vydaliła.

Kamientary da artykuła