Turcyja pačała budaŭnictva kasmadroma ŭ Samali
Turcyja pačała budaŭnictva kasmadroma ŭ Samali z metaj stvaryć ułasnuju infrastrukturu dla zapusku kaśmičnych karabloŭ i spadarožnikaŭ. Prajekt — častka Nacyjanalnaj kaśmičnaj prahramy Turcyi, jaki realizujecca na asnovie dvuchbakovaha pahadnieńnia: urad Samali pieradaŭ Turcyi ŭčastak ziamli pad budučy abjekt, piša Euronews.
Samali. Zdymak ilustracyjny. Fota: DeAgostini/Getty Images
Vybar mienavita Samali tłumačycca techničnymi i hieahrafičnymi pryčynami. Krainy kala ekvatara majuć techničnyja pieravahi dla kaśmičnych zapuskaŭ: vysokaja chutkaść kručeńnia Ziamli palahčaje vyvad rakiety na arbitu i dazvalaje aščadžać paliva. Doŭhaja ŭźbiarežnaja linija Samali, jakaja vychodzić u Indyjski akijan, daje mahčymaść zapuskać rakiety ŭ mienš nasielenych rajonach, što pavyšaje biaśpieku.
Partniorstva Turcyi i Samali raźvivajecca niekalki hadoŭ i achoplivaje humanitarnuju dapamohu, technałohii, ekanomiku i abaronu. Turcyja ŭžo zabiaśpiečvaje biaśpieku terytaryjalnych vod Samali i navučaje miascovyja vojski.
Kasmadrom u Samali — centralny elemient tureckaj kaśmičnaj prahramy. Akramia zapusku spadarožnikaŭ, jon stanie asnovaj dla raźvićcia pramysłovaj ekanomiki ŭ śfierach vytvorčaści rakietnych ruchavikoŭ, paliva, avijacyjnaj elektroniki i naziemnych sistem padtrymki. Heta dazvolić Turcyi źmienšyć zaležnaść ad zamiežnych technałohij i budzie spryjać doŭhaterminovamu technałahičnamu rostu.
Akramia stratehičnaha značeńnia, kasmadrom budzie intehravany ŭ suśvietny rynak kamiercyjnych kaśmičnych pasłuh, pryciahvajučy mižnarodnych klijentaŭ i spryjajučy ekanamičnamu raźvićciu Samali.
Budaŭnictva abjekta pa-za miežami Turcyi abhruntavana zaniataściu jaje ŭłasnaj pavietranaj i marskoj prastory. Heta nie supiarečyć i suśvietnaj praktycy: Francyja zapuskaje rakiety z Francuzskaj Hvijany, Rasija — z Bajkanura ŭ Kazachstanie, Italija — z Kienii.
U toj ža čas kaśmičnaja prahrama Turcyi maje abarončy aśpiekt: raźmiaščeńnie kasmadroma ŭ Samali dazvalaje biaśpiečna vypraboŭvać rakiety vialikaha radyusu dziejańnia i ŭzmacniaje mižnarodny prestyž krainy.
Čytajcie taksama:
Rasija zastałasia faktyčna biez spadarožnikavaj sistemy, jakaja adsočvała zapuski jadziernych rakiet
Izrail pieršym pryznaŭ Samalilend niezaležnaj dziaržavaj
«Prakładvaju darohi ŭ Samali». Jak biełarus robić svoj uniosak na OpenStreetMap
Donald Tramp zajaviŭ pra ŭdar pa «abjektach terarystaŭ» u Samali