Šviejcaryja zamaroziła ŭsie aktyvy Nikałasa Madura i abiacaje «viarnuć ich narodu»

Fiederalnaja rada Šviejcaryi pryniała rašeńnie nieadkładna zabłakavać usie aktyvy byłoha kiraŭnika Vieniesueły Nikałasa Madura i źviazanych ź im asob, jakija znachodziacca ŭ krainie. Heta było abvieščana praz dva dni paśla taho, jak Madura byŭ zachopleny ZŠA padčas razhornutaj vajskovaj apieracyi ŭ Karakasie, piša Euronews.

Nikałas Madura z Alaksandar Łukašenkam na samicie BRIKS u Kazani, 2024 hod. Fota: pres-słužba Łukašenki

Šviejcarskija ŭłady adznačyli, što miera nakiravanaja na praduchileńnie ŭciakańnia kapitału, pry hetym padkreślivajučy, što jana nie tyčycca nivodnaha člena dziejnaha vieniesuelskaha ŭrada.

U zajavie havorycca, što kali ŭ chodzie dalejšych sudovych razhladaŭ budzie dakazana niezakonnaje pachodžańnie hetych srodkaŭ, Šviejcaryja zabiaśpiečyć ich viartańnie narodu Vieniesueły.

Zamarozka aktyvaŭ dapaŭniaje sankcyi, užo ŭviedzienyja ŭ adnosinach da Vieniesueły ŭ adpaviednaści z zakonam ab embarha, jakija dziejničajuć z 2018 hoda i taksama ŭklučajuć miery pa zamarožvańni aktyvaŭ.

U paniadziełak Nikałas Madura staŭ pierad fiederalnym sudom Manchetena. Jamu vystaŭlenyja čatyry abvinavačvańni, uklučajučy «zmovu z metaj narkateraryzmu» i zachoŭvańnie aŭtamatyčnaj zbroi. Niekatoryja abvinavačvańni tyčacca taksama jaho žonki Silii Fłores, syna i niekalkich vysokapastaŭlenych čynoŭnikaŭ.

Heta pieršaje słuchańnie, viadomaje jak «abvinavaŭčaje zaklučeńnie», jakoje pačynaje sudovy praces pa vyznačeńni mahčymaści pryciahnieńnia kiraŭnika Vieniesueły da adkaznaści ŭ ZŠA.

U dzień zatrymańnia Madura dziaržsakratar ZŠA Marka Rubia zajaviŭ na płatformie X, što jon «nie źjaŭlajecca prezidentam Vieniesueły», a kiruje «kartelem Łos-Soles — narkaterarystyčnaj arhanizacyjaj, jakaja zachapiła kantrol nad krainaj».

Kamientary da artykuła