Na vajnie zahinuŭ pradstaŭnik źnikajučaha naroda — chłopiec pražyŭ usiaho 18 hadoŭ
Na vajnie zahinuŭ pradstaŭnik małakolkasnaha naroda — tafałaraŭ, pišuć «Ludzi Bajkała».
Raźvitańnie z Andrejem Chalamojevym prajšło 8 studzienia 2026 hoda ŭ Nižnieudzinsku Irkuckaj vobłaści. Chłopiec zahinuŭ u bajavych dziejańniach za try miesiacy da pachavańnia — 21 vieraśnia 2025 hoda. 2 žniŭnia jamu spoŭniłasia 18 hadoŭ.
Jak paviedamlajuć aŭtary niekrałoha, radavy Andrej Chalamojeŭ pajšoŭ na vajnu dobraachvotnikam — zaklučyŭ kantrakt ź Ministerstvam abarony RF. Byŭ strałkom-sapioram adździaleńnia zachopu šturmavoj roty.
U kamientarach da niekrałoha žychary Nižnieudzinskaha rajona pišuć, što zahinuły byŭ z Tafałaryi — ciažkadastupnaj miascovaści ŭ Irkuckaj vobłaści. Tam žyvie źnikajučy narod — tafałary. Bolšuju častku hoda ŭ sioły hornaj Tafałaryi možna dabracca tolki na viertalocie.
U daśledavańni 2016 hoda etnohrafa Viktara Kryvanohava pra tafałaraŭ zhadvajucca apošnija aleniavody hetaj miascovaści — braty Chalamojevy ź Vierchniaj Hutary. Miarkujučy z usiaho, zahinuły byŭ mienavita ź ich siamji.
U navukovaj pracy vučony Kryvanohaŭ pryvodzić taksama dakładnuju kolkaść tafałaraŭ na etničnaj terytoryi ŭ 2015 hodzie. Ich było 663 čałavieki. Ź ich dziaciej 5—9 hadoŭ — usiaho 69 čałaviek. Andreju Chalamojevu ŭ momant praviadzieńnia daśledavańnia było 8 hadoŭ.
Chalamojeŭ staŭ samym maładym zahinułym na vajnie ŭ śpisie, jaki viaduć «Ludzi Bajkała». Jon pražyŭ 18 hadoŭ i 49 dzion.