Nazvanyja samyja niebiaśpiečnyja horki ŭ Minsku dla katańnia na ciubinhu
Z 29 śniežnia ŭ Minsku padčas katańnia na ciubinhach traŭmy roznaj stupieni ciažkaści atrymali 119 čałaviek. Samamu ŭzrostavamu paciarpiełamu — bolš za 60 hadoŭ.
Ilustracyjnaje fota
Takija źviestki na apieratyŭnaj naradzie ŭ Minharvykankamie padaŭ staršynia kamiteta achovie zdaroŭja Minharvykankama Juryj Horbič, pišuć Minsk-Naviny.
Svajoj pryrodaj ciubinh źjaŭlajecca niekiravanym. Siarod tych, dla kaho spusk z horki na im skončyŭsia niaŭdała, — 76 dziaciej i 43 darosłyja. I heta tolki tyja, kamu spatrebiŭsia vyklik chutkaj miedycynskaj dapamohi.
— Častka traŭmaŭ była atrymana ŭ vyniku sutyknieńniaŭ z drevami, — udakładniŭ Ju. Horbič. — U pacyjentaŭ dyjahnastavalisia množnyja i spałučanyja traŭmy, strasieńni mozhu roznaj stupieni ciažkaści, taksama adznačalisia vypadki pierałomaŭ pazvankoŭ i kaniečnaściej.
Ju. Horbič adznačyŭ niekalki miescaŭ, dzie padčas katańnia na ciubinhach adbyłosia najbolš incydentaŭ.
U Frunzienskim rajonie adna sa stychijnych horak utvaryłasia na vulicy Łabanka, u Zavodskim — na vulicy Ałtajskaj.
— Dla katańnia nieabchodna vybirać tolki tyja miescy, jakija ŭzhodnieny z MNS. Jany abstalavany naležnym čynam, — zaklikaŭ Ju. Horbič.