Minčanka addała afierystam bolš za 40 tysiač rubloŭ, jakija źbirała na lačeńnie dziciaci
U Minsku achviaraj machlarskaj schiemy stała 43‑hadovaja žančyna: jana pieradała złačyncam uvieś svoj aščadak, pryznačany dla nabyćcia miedycynskaha abstalavańnia chvoramu dziciaci. Pra heta paviedamili ŭ HUUS Minharvykankama.
Usio pačałosia sa zvanka nibyta ad supracoŭnika damafonnaj słužby. Pad prykryćciom vydačy dadatkovych klučoŭ afieryst vyviedaŭ u minčanki jaje asabistyja źviestki kody z SMS-paviedamleńniaŭ.
Adrazu paśla hetaha ŭ hulniu ŭstupiŭ falšyvy pravaachoŭnik. Jon zajaviŭ, što na imia žančyny niechta aformiŭ kredyt i vykarystoŭvaje jaho ŭ złačynnych metach. Kab paźbiehnuć «kryminalnaj adkaznaści», minčancy prapanavali terminova zadekłaravać usie najaŭnyja hrošy.
Napałochanaja maci pieradała kurjeru bolš za 40 tysiač rubloŭ.
Milicyja zatrymała kurjera — im byŭ 28‑hadovy žychar stalicy. Vyśvietliłasia, što chłopiec sam staŭ achviaraj hetaj ža schiemy: machlary sprabavali padmanuć jaho na hrošy, ale pakolki ŭ jaho ničoha nie było, pierakanali «dapamahać pravaachoŭnikam» i zabirać pasyłki ŭ inšych ludziej.
Hrošy žančyny jon paśpieŭ pieradać nieviadomamu.
Pavodle faktu machlarstva zaviedzienaja kryminalnaja sprava.