Maładym minčankam buduć dadatkova płacić za naradžeńnie dziciaci
Staličnyja ŭłady inicyjavali novuju mieru padtrymki maładych maci — u adpaviednaści z rašeńniem Minharsavieta dla ich u horadzie ŭvodzicca śpiecyjalnaja adnarazovaja vypłata.
U apublikavanym rašeńni Miharsavieta adznačajecca, što prava na atrymańnie finansavaj dapamohi ad haradskich uładaŭ majuć žančyny, jakija naradzili dzicia va ŭzroście ad 18 da 25 hadoŭ uklučna, piša Myfin.by
Vypłata pryznačajecca na kožnaje dzicia, jakoje źjaviłasia na śviet, pačynajučy z 1 studzienia 2026 hoda. Pamier padtrymki fiksavany i składaje dva biudžety pražyvańnia (BPM), što dziejničaje na datu naradžeńnia dziciaci. Siońnia BPM składaje 491,09 rubla, tamu ciapierašni pamier vypłaty roŭny 982,18 rubla.
U toj ža čas z 1 lutaha 2026 hoda pamier biudžetu pražyvańnia ŭ Biełarusi pavinien być pavialičany.
Važnaj umovaj vypłaty srodkaŭ źjaŭlajecca najaŭnaść u žančyny pastajannaj rehistracyi pa miescy žycharstva ŭ Minsku. Dla afarmleńnia vypłaty maładaja maci pavinna źviarnucca ŭ upaŭnavažanyja orhany z adpaviednaj zajavaj.
Da zajavy nieabchodna prykłaści pakiet dakumientaŭ, jakija paćviardžajuć prava na atrymańnie hrošaj. U abaviazkovy pieralik uvachodziać śviedčańnie ab naradžeńni dziciaci, a taksama aficyjnaja daviedka, jakaja źmiaščaje źviestki pra zajmanuju žyłuju płošču ŭ Minsku, miesca žycharstva zajaŭnicy i skład jaje siamji.