Biełaruska z pratakołam pa 23.34 choča atrymać vypłaty za śmierć baćki na «SVA». Ale nie śpiašajciesia asudžać
30‑hadovaja Marharyta Turko viadzie miełanchaličnyja sacsietki, u jakich publikuje svaich katoŭ, papuhajaŭ, zamaloŭki z aharodu dy kuchni i zredku — małoha syna. Praŭda što, dniami jana apublikavała niezvyčajnuju dla siabie historyju: pryznałasia ŭ Threads, što jaje baćka «pamior na SVA», a sama jana choča atrymać «pachavalnyja» hrošy. Dopis raźlacieŭsia, adrazu ž nabiehli ŭkraincy sa zrazumiełymi emocyjami: «Nie pamior, a padoch», «A ty sama ŭžo kali?», «Žadaju vašaj siamji najchutčejšaha ŭźjadnańnia!». Ale ŭ historyi jość niuansy.
Zahinułaha na pucinskaj vajnie baćku Marharyty zvać Jaŭhien Kaleśnik. Toje, što jon nasamreč zahinuły, my viedajem tolki z paviedamleńnia jaho dački, inšym čynam pravieryć hetuju infarmacyju pakul niemahčyma — paśla siabie Jaŭhien pakinuŭ tolki nabor staronak UKantakcie, ź jakich sapraŭdy daŭno nie byŭ anłajn.
Jaŭhien Kaleśnik, fota UKantakcie
Jaŭhien, pavodle infarmacyi Belpol, naradziŭsia ŭ Oršy, a prapisany byŭ u vioscy Kanaškova ŭ Loźnienskim rajonie. U sacyjalnych sietkach jon paznačyŭ miescam svajho žycharstva Sankt-Pieciarburh. Pachavajuć jaho taksama ŭ Rasii.
Adkazvajučy na zakidy pra baćku, Marharyta naŭprost napisała internet-kamientataram: «Moj baćka pamior i mnie nie po**j tolki na vypłaty. Ja nie bačyła jaho ŭsio svajo žyćcio, jon nie ŭdzielničaŭ u maim žyćci. Potym ad alimientaŭ zvaliŭ u RF i tam, zdajecca jak, ažaniŭsia. A potym pajšoŭ na «SVA». A ja tut pry čym? Mnie jak by po**j».
«U jaho prosta nie było sensu ŭ žyćci. Mataŭsia, jak haŭno ŭ pałoncy. Žyŭ u Rasii i, mahčyma, tak sprabavaŭ znajści dla siabie niejki sens. Samarazburalnyja pavodziny. Mahčyma, ź psichikaj niešta było nie tak», — napisała Marharyta pra bijałahičnaha baćku.
Pavodle bazaŭ Belpol, dziaŭčynie sapraŭdy jość na što kryŭdavać: jaje baćku ŭ Biełarusi piać razoŭ sudzili za niaspłatu alimientaŭ na karyść dački.
Takim čynam, «pachavalnyja» paśla śmierci — adziny, apošni sposab biełaruskaha najomnika narešcie raspłacicca z dačkoj. Praŭda, kali Jaŭhien Kaleśnik byŭ žanaty ŭ Rasii druhi raz, to Marharycie pryjdziecca pazmahacca za vypłaty z druhoj siamjoj svajho bijałahičnaha baćki.
Darečy, chacia sama dziaŭčyna nie ličyć śmierć baćki trahiedyjaj i padkreślivaje tolki finansavuju zacikaŭlenaść, heta ŭžo druhi za karotki čas adychod rodnaha joj čałavieka. Pa jaje ŭłasnych słovach, dva z pałovaj hady tamu ŭ avaryi zahinuŭ jaje muž. Na toj momant ich dziciaci było šeść miesiacaŭ.
Sama Marharyta ŭ 2020‑m atrymała pratakoł pa sumnaviadomym artykule 23.34.