Mužčyna kupiŭ kvateru ŭ «darmajeda» — i zapłaciŭ za kamunałku pa poŭnym taryfie
Čamu tak atrymałasia?
Andrej niadaŭna nabyŭ žyllo ŭ Homieli, raskazvaje vydańnie «Biełka».
«Ja kupiŭ kvateru ŭ čałavieka, nie zaniataha ŭ ekanomicy. Kamunalnyja pasłuhi jamu naličvalisia pa poŭnym košcie. Były haspadar vysialaŭsia tydzień. Prykładna stolki ž mnie spatrebiłasia, kab pieraaformić žyllo na siabie», — raspavioŭ hamialčuk.
Akazałasia, što ŭvieś hety čas kamunałku praciahvali naličvać pa poŭnych taryfach. «Čamu ja pavinien pierapłačvać, kali ŭsio žyćcio pracuju?» — zadajecca pytańniem mužčyna.
U Raźlikova-daviedačnym centry horada Homiela adkazali, što płacielščykam žyllova-kamunalnych pasłuh novy haspadar kvatery stanovicca tolki z momantu rehistracyi prava ŭłasnaści na jaje.
Paradak nastupny: u Homielskim ahienctvie pa dziaržaŭnaj rehistracyi i ziamielnym kadastry treba zarehistravać pierachod prava ŭłasnaści na kvateru i atrymać paśviedčańnie.
Paśla z hetym dakumientam treba źviarnucca ŭ arhanizacyju, jakaja ažyćciaŭlaje naličeńni, dla adkryćcia asabovaha rachunku. Tolki tady były ŭłaśnik pierastaje być płacielščykam. A značyć, kamunałku pačnuć naličvać novamu haspadaru pa ilhotnych taryfach.
Płata za ŽKP pa subsidavanych taryfach budzie naličvacca pry ŭmovie, što ŭ žyłym pamiaškańni majucca zarehistravanyja pa miescy žycharstva hramadzianie. U advarotnym vypadku buduć prymianiacca taryfy, jakija zabiaśpiečvajuć poŭnaje pakryćcio ekanamična abhruntavanych zatrat.