Devid i Viktoryja Bekchemy mocna nie paładzili sa svaim starejšym synam. Jon abvinavaciŭ ich publična

U brytanskaj presie niekalki miesiacaŭ chadzili čutki pra niełady ŭ adnosinach pamiž brytanskimi supierzorkami — futbalistam Devida Bekchema i śpiavačkaj Viktoryi Bekchem (Adams), — i ich starejšym synam Bruklinam Pelc-Bekchemam. Adnak aficyjnaha paćviardžeńnia hetamu nie było. Ciapier ža Bruklin apublikavaŭ doŭhaje paviedamleńnie ŭ Instagram, dzie ŭpieršyniu raskazaŭ pra kanflikt u siamji i adkryta pryznaŭ, što nie choča naładžvać ź joj adnosiny.

Bruklin, Devid i Viktoryja Bekchemy. Fota: Getty Image

Bruklin abvinavaciŭ baćkoŭ u tym, što jany «biez kanca sprabavali razburyć» jahonyja adnosiny z žonkaj Nikołaj jak da šlubu, tak i paśla jaho. Pavodle jaho słoŭ, baćki pastajanna prydzirajucca da Nikoły i pavodziać siabie niedarečna jak u pryvatnym, tak i ŭ hramadskim žyćci, a niekatoryja detali asabistaha žyćcia pieradavali presie bieź ich dazvołu.

Taksama Bekchem-małodšy adznačyŭ, što jahonaja maci, Viktoryja Bekchem, jakaja vałodaje modnym brendam, nibyta sprabavała pieraškodzić viasiellu syna ŭ 2022 hodzie, admoviŭšysia ŭ apošni momant pašyć viasielnuju sukienku dla Nikoły, niahledziačy na toje, što taja była radaja apranuć reč jaje dyzajnu. Praŭda, Nikoła paźniej śćviardžała, što prablemy z sukienkaj adbylisia tolki z-za taho, što atelje prosta nie paśpieła b skončyć pracu ŭ termin.

Bruklin taksama raskazaŭ, što jon i Nikoła pryjechali ŭ Łondan na dzień naradžeńnia Devida, ale ceły tydzień atrymlivali adkazy «nie», kali sprabavali pravieści asabisty čas z baćkam. Na 50‑hadovy jubilej Devida para taksama nie źjaviłasia i nie apublikavała vinšavańni ŭ sacsietkach, što ŭzmacniła čutki pra siamiejny kanflikt.

Pavodle Bruklina, baćka pahadziŭsia sustrecca ź im tolki na ŭmovach, što žonka nie budzie prysutničać, što jon uspryniaŭ jak «poŭchu». Paźniej siamja taksama nie sustrakałasia ź im padčas ich pajezdki ŭ Łos-Andželes.

Bruklin i Nikoła žyvuć u ZŠA. Bruklin pačynaŭ svaju karjeru jak fatohraf i ŭ 2017 hodzie vydaŭ svoj pieršy fotaalbom What I See («Toje, što ja baču»).

Kamientary da artykuła