Alaksandr Rybak znoŭ rychtujecca da adboru na «Jeŭrabačańnie»
Narviežski vykanaŭca biełaruskaha pachodžańnia voźmie ŭdzieł u finale Melodi Grand Prix — nacyjanalnym adbory Narviehii na mižnarodny konkurs pieśni «Jeŭrabačańnie», paviedamlajuć narviežskija miedyja.
Rybak trapiŭ u lik vaśmi finalistaŭ adboračnaha etapu, jaki projdzie 28 lutaha ŭ Lilechamiery. Jašče adzin finalist budzie vybrany na hladackim hałasavańni.
Pry hetym usie dzieviać konkursnych piesień źjaviacca na stryminhavych płatformach užo z 26 studzienia. Vyklučeńnie tut mienavita trek Alaksandra Rybaka Rise, jaki ŭžo možna pasłuchać na placoŭkach.
Alaksandr vyjhraŭ konkurs «Jeŭrabačańnie» ŭ Maskvie ŭ 2009 hodzie ź pieśniaj Fairytale, nabraŭšy tady bałaŭ bolš za lubuju inšuju pieśniu ŭ historyi konkursu.
U 2018‑m jon znoŭ udzielničaŭ u konkursie i zaniaŭ 15‑ie miesca.
Sioleta «Jeŭrabačańnie» projdzie ŭ Aŭstryi (finał 16 maja). Irłandyja, Isłandyja, Ispanija, Niderłandy i Słavienija vyrašyli nie ŭdzielničać u znak pratestu suprać udziełu Izraila.
Biełaruś nie ŭdzielničaje ŭ konkursie z 2021 hoda. Tady hurt «Hałasy ź miesta» byli vyklučany z-za palityčnaha padtekstu pieśni, a z 2022 hoda Biełaruś i Rasija vyklučany z-za vajny va Ukrainie.
Najvyšejšym dasiahnieńniem Biełarusi na «Jeŭrabačańni» źjaŭlajecca 6‑ie miesca Dźmitryja Kałduna ŭ 2007 hodzie.