U Minsku pabudujuć most pamiž Łošycaj i Sierabrankaj. Kali pačnuć?
Puciepravod pamiž Łošycaj i Sierabrankaj pačnuć uzvodzić paśla taho, jak pabudujuć most pamiž Masiukoŭščynaj i Cimirazieva. Ab hetym raspavioŭ staršynia Minharvykankama Uładzimir Kucharaŭ, piša ahienctva «Minsk-Naviny».
Na sustrečy kiraŭnika Minska z kalektyvam «Viteks» žychar Leninskaha rajona cikaviŭsia płanami pa stvareńni transpartnaj raźviazki pamiž Łošycaj i Sierabrankaj.
Most moža być tut
— Tak, heta praduhledžana Hienpłanam. Ad Paŭdniovaj mahistrali praciahniecca puciepravod praz čyhunku, a druhi — u rajonie vuł. Maniuški, praz raku Śvisłač. Hetyja raboty pačniom paśla zaviaršeńnia budaŭnictva puciepravoda, jaki złučyć Masiukoŭščynu z vuł. Cimirazieva, — adkazaŭ Kucharaŭ.
Most ža pamiž Kamiennaj Horkaj i Masiukoŭščynaj pačnuć budavać u 2026 hodzie.