Saudaŭskaja Aravija radykalna pierahladaje płany adnosna horada budučyni koštam $500 miljardaŭ — nie chapaje hrošaj
Ambicyjnaja ideja futurystyčnaha miehapolisa na Čyrvonym mory, jaki pavinien byŭ stać simvałam novaj Saudaŭskaj Aravii, apynułasia pad pahrozaj. Karaleŭstva, vidać, pieraacaniła svaje siły ŭ ambicyjnym prajekcie.
Nieom. Kałaž. Krynica: neom.com
U 2017 hodzie ŭ pravincyi Tabuk na paŭnočnym uskrajku Saudaŭskaj Aravii, pamiž Čyrvonym moram i miažoj ź Iardanijaj pad niepasrednym kiraŭnictvam naślednaha prynca Muchamieda bien Sałmana, jaki źjaŭlajecca faktyčnym kiraŭnikom dziaržavy, raspačaŭsia hrandyjozny prajekt Nieom.
Na terytoryi 27 tysiačy kvadratnych kiłamietraŭ płanavałasia stvaryć płyvučy pramysłovy kompleks, hłabalny handlovy centr, hornałyžnyja i marskija kurorty, a taksama ŭnikalny liniejny horad «The Line», jaki całkam zabiaśpiečvajecca adnaŭlalnaj enierhijaj.
Hetaja inicyjatyva stała klučavym elemientam prahramy «Bačańnie Saudaŭskaj Aravii 2030», nakiravanaj na radykalnuju madernizacyju krainy i dyviersifikacyju jaje ekanomiki praz adychod ad naftavaj zaležnaści.
Naśledny prync Saudaŭskaj Aravii Machamied bien Sałman. Fota: Saudi Press Agency via AP
Ukłaŭšy miljardy dalaraŭ u prajekt, jak piša The Times, ułady karaleŭstva vyrašyli pierahladzieć chod budaŭnictva i pačali skaračać maštaby prajekta.
Najbolš paciarpieŭ centralny elemient Nieom — prajekt «The Line» pa budaŭnictvie liniejnaha horada z chmaračosaŭ vyšynioj kala paŭkiłamietra, jakija ciahnulisia b na 200 kiłamietraŭ praz pustyniu. Płanavałasia, što horad budzie składacca ź siehmientaŭ daŭžynioj kala dvuch kiłamietraŭ, a ahulny biudžet prajekta aceńvaŭsia ŭ 500 miljardaŭ dołaraŭ. Zaviaršeńnie budaŭnictva abiacali da 2030 hoda.
Pieršapačatkova ličyłasia, što taki horad zdolny vyrašyć prablemy demahrafičnaha rostu: nasielnictva krainy, jakoje ŭžo dasiahnuła 35 miljonaŭ čałaviek, chutka pierarastaje tradycyjnyja harady, u tym liku Er-Ryjad, raźmieščany ŭ pustyni. Pry hetym kronprync, jak śćviardžajuć krynicy, śviadoma staviŭ maksimalna zavyšanyja mety, raźličvajučy, što chacia b častka ź ich budzie dasiahnuta.
Finansavy cisk, vyklikany padzieńniem cen na naftu i chraničnym deficytam biudžetu, prymusiŭ urad i Suvierenny inviestycyjny fond, jaki kuryruje Nieom, šukać bolš prahmatyčnyja šlachi raźvićcia. U pryvatnaści, u śfiery štučnaha intelektu. Karaleŭstva imkniecca ŭstupić u hłabalnuju honku i kankuravać z susiednimi AAE, układvajučy vielizarnyja srodki ŭ stvareńnie sučasnych data-centraŭ.
Mastackaja kancepcyja vonkavaj prastory harnałyžnaha kurorta «Tradžena». Fota: Wikimedia Commons
Hety padychod vyhladaje bolš realistyčnym, čym sproby pabudavać hornałyžny kurort «Tradžena» sa štučnym śnieham, jaki pavinien byŭ pryniać Zimovyja Azijackija hulni 2029 hoda, abo hihancki płavučy chab «Aksahon», jakija ŭžo ciapier nie ŭpisvajucca ŭ vyznačanyja hrafiki budaŭnictva.
Vizualizacyja Aksahonu. Fota: neom.com
Na siońnia adzinym abjektam Nieoma, jaki faktyčna adkryŭsia, staŭ jacht-kłub i kurort Sindała na Čyrvonym mory. Pavodle źviestak ŚMI, hety abjekt, jaki pavinien byŭ stać vizitnaj kartkaj prajekta, abiarnuŭsia darahim pravałam i kaštavaŭ pasady hienieralnamu dyrektaru Nadmi al-Nasru. Prync zastaŭsia niezadavoleny nie tolki vielizarnymi vydatkami, ale i sprobami kiraŭnictva štučna zavysić pakazčyki pośpiechu, kali dla stvareńnia iluzii masavaści za košt biudžetu Nieoma byli arandavany 40 jacht.
Sindała. Fota: neom.com
Paralelna z hetymi ekanamičnymi prablemami ŭ Saudaŭskaj Aravii praciahvajucca maštabnyja sacyjalnyja reformy, zaklikanyja madernizavać adno z samych kansiervatyŭnych hramadstvaŭ śvietu. Abmiežavańnie ŭłady relihijnaj palicyi i pašyreńnie pravoŭ žančyn, u tym liku dazvoł na kiravańnie aŭtamabilem, zabiaśpiečyli naślednamu pryncu padtrymku siarod moładzi. Adnak adnačasova jon sutykajecca z vostraj krytykaj za represii suprać inšadumcaŭ — niekatoryja ź ich atrymali šmathadovyja turemnyja terminy za pasty ŭ sacyjalnych sietkach.