19‑hadovuju influensierku zastrelili padčas pratestaŭ u Iranie
Iranskuju błohierku i aktyvistku Dzijanu Bachador, viadomuju jak Baby Rider, zastrelili padčas pratestaŭ u Iranie. Jana lubiła matacykły, vykonvała truki, publična źjaŭlałasia ŭ internecie biez chidžaba i śmieła pratestavała suprać žorstkich represij iranskaha režymu, piša BILD.
Influensierku, pa infarmacyi The Telegraph, zabili pradstaŭniki orhanaŭ biaśpieki padčas niadaŭnich pratestaŭ u Iranie.
Pravaabarončyja arhanizacyi kažuć pra prycelnyja streły, vidavočcy — pra prymianieńnie ciažkaj zbroi. Mierkavana, u jaje patrapili dźvie kuli.
Jaje cieła pieradali siamji tolki praz dva dni. Niezaležnaha rasśledavańnia nie pravodziłasia. Režym adchilaje abvinavačvańni: iranskija dziaržaŭnyja ŚMI zajavili pra avaryju na matacykle. Influensierka nibyta straciła kantrol nad transpartnym srodkam i ŭrezałasia ŭ adbojnik.
Baby Rider adkryta vystupała suprać praviłaŭ režymu muł i pakazvałasia ŭ sietcy biez chidžaba. U jaje było kala 200 tysiač padpisčykaŭ u instahramie.
Siamja była vymušana pravieści tajnaje pachavańnie i publična zajavić, što adbyŭsia niaščasny vypadak.