Byłaja žonka Biła Hiejtsa vykazałasia nakont jaho kantaktaŭ z Epštejnam
Paśla publikacyi fajłaŭ Epštejna, u jakich fihuruje imia byłoha kiraŭnika Microsoft Biła Hiejtsa, jaho byłaja žonka Mielinda vykazałasia ŭ padkaście National Public Radio.
Bryan Bedder/Getty Images for Bloomberg Philanthropies
Jana zaklikała byłoha muža adkryta adkazać na pytańni pra jaho kantakty z asudžanym złačyncam Džefry Epštejnam, a taksama zajaviła, što adčuvaje «nievierahodnuju smutu», piša Bild.
Mielinda Hiejts skazała: «Nivodnaja dziaŭčynka nikoli nie pavinna była apynucca ŭ toj situacyi, u jakuju ich pryvioŭ Epštejn, — niezaležna ad taho, što adbyvałasia z usimi roznymi ludźmi vakoł jaho. Nivodnaja dziaŭčynka. Heta prosta razryvaje serca. […] Ja spadziajusia, što dla hetych ciapier užo darosłych žančyn budzie spraviadlivaść. […] Toje, praz što jany prajšli, prosta niemahčyma ŭjavić».
Naviny pra fajły Epštejna vyklikajuć u Mielindy ciažkija asabistyja ŭspaminy — pra jaje ŭłasnaje junactva, pra čas, kali jaje dočki byli va ŭzroście achviar, a taksama pra «vielmi, vielmi balučyja časy» ŭ jaje šlubie z Hiejtsam. Pra zhadvańni jaho imia ŭ fajłach Epštejna jana kaža: «Hetyja pytańni — sprava hetych ludziej i majho byłoha muža. Jany pavinny adkazvać na heta, a nie ja».
Bił i Mielinda Hiejts byli ŭ šlubie z 1994 pa 2021 hod. Pryčynaj razvodu Mielinda nazvała zdrady svajho muža i jaho siabroŭstva z Epštejnam. Paźniej Bił Hiejts nazvaŭ hetaje siabroŭstva pamyłkaj.