Čamu apošnim časam tak trasie dalar i zołata?
Za pieršy miesiac 2026 hoda kurs biełaruskaha rubla adnosna dalara ZŠA vahaŭsia ad 2,8 da 2,95 rubla. Jašče bolš u studzieni vahałasia cana zołata — ad 4353 da 5562 dalaraŭ za uncyju. Ekśpiertka BEROC Nastaśsia Łuzhina tłumačyć, čamu tak adbyvajecca.
Ilustracyjny zdymak. Fota: «Naša Niva»
Vahańni kursu dalara adbyvajucca nie tolki adnosna biełaruskaha rubla, ale i ŭ dačynieńni da suśvietnych valut. Pryčyna ŭ źniešnich faktarach. Pa słovach Łuzhinoj, upłyvaje adrazu šerah hieapalityčnych momantaŭ — naprykład, uzajemaadnosiny ZŠA ź Iranam i Vieniesuełaj.
«Akramia hetaha, na minułym tydni adbyłasia jašče adna važnaja padzieja — Tramp prapanavaŭ pryznačyć novaha kiraŭnika Fiederalnaj reziervovaj sistemy (FRS). Heta chutčej pazityŭna adbiłasia na dalary, pakolki ŭ Trampa byli supiarečnaści z raniejšym kiraŭnikom FRS, što nie dadavała ŭstojlivaści amierykanskaj valucie», — ličyć ekśpiert.
Na kurs biełaruskaha rubla da dalara ŭpłyvaje jašče i rehijanalny faktar. Tak, rasijski rubiel u apošni miesiac taksama značna vahaŭsia ŭ miežach 74—80 rubloŭ za dalar. Pryčyna tamu — pieramovy pa vajnie va Ukrainie.
«Rasijski rubiel, choć užo i bolš strymana, ale ŭsio ž reahuje na pieramovy. Taksama važnym faktaram zastajucca ekanamičnyja aśpiekty: pastupleńni ad ekspartu, a taksama prychod padatkovaha pieryjadu — apošniaje karotkaterminova ŭmacavała rasijski rubiel da zamiežnych valut na minułym tydni», — adznačaje ekśpiert.
Havoračy pra situacyju ŭ cełym, Łuzhina adznačaje, što ŭ apošnija tydni my nazirajem kanjunkturnyja vahańni, jakija nosiać karotkaterminovy charaktar.
Ilustracyjny zdymak. Fota: «Naša Niva»
Biehčy ŭ abmieńnik nie varta?
Vahańni dalara, adznačaje Łuzhina, nosiać karotkaterminovy charaktar.
«Pakolki kurs biełaruskaha rubla vahajecca ŭ abodva baki da dalara, ale zastajecca stabilnym da košyka valut, heta aznačaje, što kursavyja vahańni vyklikanyja nie doŭhaterminovymi źmienami, a uździejańniem hieapalityčnych faktaraŭ albo upłyvam, vyklikanym karotkaterminovymi reakcyjami rynkaŭ», — tłumačyć ekśpiert.
Łuzhina jašče raz padkreślivaje, što kursavyja vahańni ŭ Biełarusi — heta ŭ pieršuju čarhu vynik źniešnich faktaraŭ, a nie ŭnutranych.
«My nie možam kazać, što ciapier adbyvajecca niejki cisk na valutnym rynku Biełarusi», — adznačaje ekanamist.
Zołata trasie našmat kruciej za kursy valut
Što tyčycca cany na zołata, to šmat u čym takija pavodziny rynku taksama źviazany z hieapalityčnymi pracesami.
«U situacyi niestabilnaści inviestary imknucca ŭkładvać choć by častku svaich srodkaŭ u nadziejnyja aktyvy, da jakich adnosicca zołata. Kali ž u śviecie adbyvajecca peŭnaja stabilizacyja, to popyt na zołata moža źnižacca i adpaviedna budzie reahavać i košt», — adznačaje Łuzhina.
Pry hetym ekśpiert ličyć, što, niahledziačy na ruch u bok deeskałacyi, u bližejšy čas zachavajecca pieryjad vałacilnaści.
A na kurs biełaruskaha rubla, akramia vyšejpieraličanych faktaraŭ, mohuć paŭpłyvać vyniki pasiadžeńnia Centrabanka RF, na jakim buduć vyrašać, pierahladać pracentnyja staŭki ci nie.
«Kali, naprykład, staŭki źniziać, to rasiejski rubiel moža patańnieć, a biełaruski budzie paŭtarać jaho trajektoryju».