U Francyi dvuch bliźniat abvinavačvajuć u zabojstvach. Chto mienavita nacisnuŭ na kurok, nieviadoma — u ich adnolkavaja DNK
U Francyi dvoje adnajajcavych bliźniataŭ apynulisia na łavie padsudnych pa abvinavačvańni ŭ niekalkich zabojstvach.
Thomas Frey/picture alliance via Getty Images
Prakurory pakul nie zmahli vyznačyć, chto ź ich stralaŭ padčas adnaho z napadaŭ, pakolki abodva abvinavačanyja majuć adnolkavaje DNK, piša Bi-bi-si.
Dvum 33‑hadovym bratam i jašče trom žycharam Francyi vystaŭlenyja abvinavačvańni ŭ dvajnym zabojstvie i jašče niekalkich sprobach ździejśnić zabojstvy. Havorka idzie pra padziei, jakija adbylisia ŭ vieraśni 2020 hoda.
Prakurory miarkujuć, što abvinavačanyja byli členami bandy, jakaja dziejničaje ŭ pryharadach Paryža.
U datyčnaści da złačynstvaŭ padazrajucca abodva braty, ale adno z hałoŭnych pytańniaŭ — čyj mienavita hienietyčny materyjał byŭ vyjaŭleny na aŭtamacie, jaki vykarystoŭvaŭsia padčas adnaho z napadaŭ, — zastajecca adkrytym.
Supracoŭnik palicyi paviedamiŭ sudu, što ekśpierty tak i nie zmahli vyśvietlić, chto ź ich spuściŭ kurok. «Ich moža adroźnić tolki maci», — skazaŭ adzin sa śledčych u sudzie.
Paviedamlajecca, što atmaśfiera ŭ zale pasiadžeńniaŭ była nadzvyčaj napružanaja. U čaćvier bliźniaty byli vydaleny z suda, pakolki admovilisia ŭstać.
Jak zajaŭlaje palicyja, braty vykarystoŭvali svajo padabienstva, kab schavać ślady ździejśnienych imi złačynstvaŭ. Le Parisien cytuje adnaho z palicejskich, pa słovach jakoha jany časta abmieńvalisia adzieńniem, telefonami i dakumientami.
Identyčnyja bliźniaty raźvivajucca ŭ adnoj apłodnienaj jajkakletcy, jakaja dzielicca padčas ciažarnaści napałovu. U ich całkam adnolkavaje DNK, tamu ekśpierty nie mohuć vyznačyć, čyj mienavita hienietyčny materyjał byŭ znojdzieny na zbroi.
Adnolkavyja, ale nie zusim
Razam z tym, sučasnyja technałohii ŭ niekatorych vypadkach dazvalajuć adroźnić hienietyčnyja ŭzory identyčnych bliźniat.
U žniŭni 2025 hoda ŭ ZŠA adzin ź bliźniat byŭ upieršyniu prysudžany na padstavie analizu DNK. Prysiažnyja pryznali 54‑hadovaha Raseła Marubia vinavatym u zhvałtavańni, ździejśnienym u 1987 hodzie.
Tady akazałasia, što vyjaŭlenaje padčas śledstva DNK naležyć dvum bratam-bliźniatam — i sproby raskryć złačynstva byli prypynienyja.
Adnak amal 40 hadoŭ paźniej navukoŭcy zmahli vyjavić niekatoryja ŭnikalnyja mutacyi, jakija adbylisia ŭžo paśla raździaleńnia jajkakletki.
«U siarednim u bliźniat jość vosiem takoha rodu adroźnieńniaŭ, jakija prypadajuć na 3 młrd asnoŭ [hienomu]», — cytuje vydańnie Elen Hrejtak, pradstaŭnika kampanii Parabon, jakaja zajmajecca daśledavańniami DNK.
U vyniku ekśpierty zmahli identyfikavać niekatoryja z hetych malusieńkich mutacyj, i adzin z bratoŭ byŭ pryznany vinavatym.