Makron: Kali my ničoha nie zrobim, to praź piać hadoŭ Jeŭropy nie budzie
Prezident Francyi daŭ intervju viadučym jeŭrapiejskim hazietam, u jakim žorstka raskrytykavaŭ marudlivaść Jeŭropy.
Fota: Ludovic Marin / AP
Pavodle słoŭ Makrona, Jeŭropa zaŭsiody ciarpieła paražeńnie, «kali była marudlivaj i razdrobnienaj», piša Bild.
Najlepšy prykład — finansavy kryzis. Jon pryjšoŭ z ZŠA, ale Jeŭropa paciarpieła «ŭ dziesiać razoŭ bolš», bo raspylałasia zamiest taho, kab dziejničać razam. Zusim inakš było padčas pandemii COVID: «My dziejničali vielmi chutka i adzinym frontam», — z honaram adznačaje Makron.
Adnak ciapier, pavodle słoŭ prezidenta, nadychodzić čarhovaje vyprabavańnie na tryvałaść. Tramp, mytnyja pošliny, Hrenłandyja — i Jeŭropa, jakaja zanadta časta supakojvajecca iluzijaj biaśpieki: «Nie viercie ni na siekundu, što ŭsio skončana. Kožny dzień, kožny tydzień prynosiać novyja pahrozy. Jeŭropa pakutuje ad traŭmy: paśla kožnaj eskałacyi nadychodzić bajaźlivaja palohka. Hety ž kryzis ujaŭlaje saboj hłyboki hieapalityčny razłom», — papiaredžvaje jon.
Makron zapatrabavaŭ ad Jeŭropy «vyjści sa stanu hieapalityčnaj niaśpiełaści».
Pavodle jaho słoŭ, Jeŭropa pavinna myślić katehoryjami ŭłady, zabiaśpiečvać abaronu i maštabna inviestavać — u abaronu, technałohii, štučny intelekt, kvantavyja kampjutary: «Heta bitvy, jakija nieabchodna vyjhrać. Kali my ničoha nie zrobim, to praź piać hadoŭ Jeŭropy nie budzie».