Adzin z ukraincaŭ, jakoha rasijskija vojski siłkom vyvieźli z-pad Kijeva, pamior u Biełarusi
Rasijskija vajskoŭcy ŭ sakaviku abo krasaviku 2022 hoda prymusova vyvieźli z Baradzianki Bučanskaha rajona Kijeŭskaj vobłaści hramadzianina Ukrainy i pakinuli jaho na terytoryi Biełarusi. Jon pamior i pachavany ŭ Rečyckim rajonie, piša «Radyjo Svaboda».
Impravizavany miemaryjał pa zahinułych u Baradziancy ŭ 2022 hodzie. Zdymak ilustracyjny. Fota: AP Photo/Vadim Ghirda
Jak stała viadoma «Radyjo Svaboda», hetaha pažyłoha mužčynu, jak i inšych ukraincaŭ, jakich prymusova vyvieźli ŭ Biełaruś, padčas rasijskaj akupacyi horada Baradzianka pad Kijevam, trymali ŭ miascovaj carkvie, na toj momant u padparadkavańni Maskoŭskaha patryjarchatu.
Paśla ŭkrainca pryvieźli ŭ Homielskuju vobłaść, u mai 2022 hoda zavieźli ŭ viosku Chołmieč Rečyckaha rajona i źmiaścili ŭ miascovy terytaryjalny centr sacyjalnaha absłuhoŭvańnia nasielnictva. Jon žyŭ u adździaleńni zabieśpiačeńnia bieśpierapynnaha znachodžańnia hramadzian stałaha ŭzrostu i invalidaŭ, a 9 vieraśnia 2025 hoda pamior u vieku 86 hadoŭ. Ukrainca pachavali na miascovych mohiłkach.
Sud va Ukrainie ciapier pryznaŭ jaho pamierłym.
Rasijskija vojski 24 lutaha 2022 hoda ŭvarvalisia ŭ Čarnihaŭskuju i Kijeŭskuju vobłaści Ukrainy z terytoryi Biełarusi.
U kancy sakavika, paśla vyzvaleńnia ad rasijskich vojskaŭ hetych abłaściej, stała viadoma, što pierad adychodam rasijcy prymusova vyvozili mirnych žycharoŭ u Biełaruś, a potym u Rasiju. Bolšaść ich trapili ŭ rasijski pałon, inšych pakidali ŭ Biełarusi.
Pravaachoŭnyja orhany Ukrainy zaviali 11 433 kryminalnyja spravy na rasijskich vajskoŭcaŭ za vajennyja złačynstvy, a taksama spravy na ŭkrainskich kałabarantaŭ.
Buča, Baradzianka i Irpień Kijeŭskaj vobłaści stali simvałami žorstkaści rasijskich vajskoŭcaŭ da cyvilnaha nasielnictva.
Raniej stała viadoma ab śmierci vyviezienaj hramadzianki Ukrainy ŭ domie-internacie dla sastarełych u Vietcy Homielskaj vobłaści praz try miesiacy paśla jaje prymusovaj departacyi rasijskimi vajskoŭcami z Kijeŭskaj vobłaści ŭ Biełaruś.
U śniežni 2023 hoda stała viadoma ab śmierci ŭ Biełarusi 15‑hadovaj Aryny Jaciuk, paranienaj rasijskimi sałdatami ŭ sakaviku 2022 hoda pad Kijevam pry sprobie evakujavacca. Jaje cieła znajšli ŭ morhu Mazyra. Uvieś hety čas svajaki šukali jaje ŭ niekalkich krainach, u tym liku ŭ Biełarusi. Dziaŭčynku apaznali pa DNK paśla taho, jak cieła pieradali va Ukrainu ŭ paradku abmienu.