Ukrainskija vojski paviedamili pra ŭdały kontrnastup na poŭdni
Na fonie błakiroŭki rasijskich terminałaŭ «Starlink» ukraincy vyzvalili bolš za 300 kv. km, vosiem nasielenych punktaŭ.
Całdaty jeduć u kuzavie hruzavika na zadańnie na pieradavuju ŭ Zaparožskaj vobłaści, 10 lutaha 2026 hoda. Fota: Andrej Andryjenka / 65‑ia miechanizavanaja bryhada Ukrainy via AP
Desantna-šturmavyja vojski Ukrainy paviedamili pra kontrnastupalnuju apieracyju na Alaksandraŭskim kirunku.
Hrupoŭka sprabuje strymać dalejšaje prasoŭvańnie rasijskaj armii ŭ Dnieprapiatroŭskaj i Zaparožskaj abłaściach i vycisnuć jaje za miežy administracyjnaj miažy Dnieprapiatroŭskaj vobłaści.
Z pačatku kontrnastupu hrupoŭka Desantna-šturmavych vojskaŭ razam z sumiežnymi padraździaleńniami vyzvaliła bolš za 300 kv. km, vosiem nasielenych punktaŭ.
«Pakul tryvaje aktyŭnaja faza apieracyi, kazać pra kančatkovyja jaje vyniki krychu zaŭčasna», — adznačajuć vajskoŭcy.
Raniej prezident Ukrainy Uładzimir Zialenski raskazvaŭ pra vyzvaleńnie 300 kv. km na fonie błakiroŭki rasijskich terminałaŭ «Starlink».
Taksama aficer Uzbrojenych Sił Ukrainy Andrej Tkačuk paviedamlaŭ pra ŭdały kontnastup na poŭdni — u kirunku nasielenych punktaŭ Paŭłaŭka, Uśpienaŭka i Ciarnavataje Zaparožskaj vobłaści. Udałosia heta dziakujučy błakavańniu «Starlink» dla rasiecaŭ na froncie i padrychtoŭcy ŭkrainskich vajskoŭcaŭ, adznačaŭ aficer u kamientary telekanału «My — Ukraina».
Pra kontrnastupleńnie ŭ Dnieprapiatroŭskaj vobłaści paviedamlali i analityki DeepState. Tady kazałasia, što ŭkrainskaja armija adkinuła rasijskija vojski kala Kalinoŭskaha i ŭ Ciarnovym.