Hvałt u Mieksicy paśla hibieli narkabarona El Mienča: Nacyjanalnaja hvardyja straciła 25 čałaviek
U Mieksicy ŭspychnuła maštabnaja chvala hvałtu paśla zabojstva lidara kartela «Chaliska — Novaje Pakaleńnie» El Mienča: bajeviki pierakryvali darohi i atakavali siłavikoŭ u niekalkich štatach.
Leonardo Montecillo / Agencia Press South / Getty Images
Pavodle źviestak ministra biaśpieki, u vyniku hetych napadaŭ zahinuli jak minimum 25 bajcoŭ Nacyjanalnaj hvardyi, piša Bi-bi-si.
59‑hadovy Niemiesia Asiehiera Siervantes, bolš viadomy pad mianuškaj «El Mienča», pamior ad ranaŭ, atrymanych u niadzielu padčas apieracyi pa jaho zatrymańni, praviedzienaj mieksikanskim śpiecnazam.
Paśla hetaha jak minimum u 20 z 31 štata Mieksiki ŭspychnuli sutyknieńni z udziełam bajevikoŭ kartela «Chaliska — Novaje Pakaleńnie» (CJNG), zasnavanaha zabitym kryminalnym lidaram.
Jak paviedamiŭ u paniadziełak presie ministr abarony Mieksiki Rykarda Trevilja, na zachad krainy na achovu paradku adpraŭleny 2500 sałdat.
CJNG — adna z samych niebiaśpiečnych mafijoznych arhanizacyj Mieksiki, a jaje niabožčyk lidar byŭ pieršym numaram u śpisie złačyncaŭ, jakich šukajuć u krainie.
Pa słovach ministra abarony, zmahary z narkamafijaj zmahli schapić El Mienča ŭ horadzie Tapalpa ŭ štacie Chaliska, vysačyŭšy jaho paluboŭnicu. Jon byŭ ciažka paranieny ŭ pierastrełcy pamiž jaho achoŭnikami i śpiecnazam. Vajskoŭcy pavieźli jaho pa pavietry ŭ stalicu, ale jon pamior pa darozie.
U pierastrełcy, zhodna z zajavaj Ministerstva abarony, byli zabity jak minimum šaściora achoŭnikaŭ El Mienča i paranieny troje vajskoŭcaŭ.
Ministr biaśpieki Mieksiki Amar Harsija Charfuč paviedamiŭ presie, što z momantu śmierci El Mienča, akramia 25 nachvardziejcaŭ, zabity jašče bolš za 30 čałaviek: 30 členaŭ kartela, turemny achoŭnik i supracoŭnik prakuratury štata.
Prezident Mieksiki Kłaŭdyja Šejnbaŭm pachvaliła vajskoŭcaŭ za apieracyju pa zatrymańni El Mienča i skazała, što zaraz hałoŭnaje dla jaje — adnavić spakoj i paradak u krainie.
«Na bolšaj častcy terytoryi krainy ŭsio idzie ŭ zvyčajnym režymie, — napisała Šejnbaŭm u sacsietcy Ch. — Padtrymlivajecca poŭnaja kaardynacyja z uradami ŭsich štataŭ; my pavinny zastavacca ŭ kursie padziej i zachoŭvać spakoj».
Kartel «Chaliska — Novaje Pakaleńnie» (CJNG) uźnik prykładna ŭ 2010 hodzie ŭ štacie Chaliska i z časam raspaŭsiudziŭ svoj upłyŭ pa ŭsioj krainie.
Atrymaŭšy viestku pra śmierć El Mienča, členy kartela «Chaliska — Novaje Pakaleńnie» pačali ładzić biesparadki ŭ mnohich haradach Mieksiki.
U niekatorych miescach jany pierakryvali darohi, raskidajučy pa asfalcie šypy i ćviki, jakija prakołvali šyny aŭtamabilaŭ. U inšych — zachoplivali mašyny i aŭtobusy, padpalvali ich i błakavali imi trasy.
Akramia taho, byli padpaleny dziasiatki kramaŭ, ofisaŭ i adździaleńniaŭ bankaŭ.
U mnohich haradach u niadzielu vulicy abiaźludzieli: miascovyja ŭłady rekamiendavali ludziam zastavacca doma.
Prezident Šejnbaŭm zajaviła, što da ranicy paniadziełka ŭsie darohi byli razbłakavany.
El Mienča šukali i Złučanyja Štaty: Dziarždepartamient prapanoŭvaŭ 15 młn dalaraŭ za infarmacyju, jakaja dapamahła b jaho złavić.
Ministerstva abarony Mieksiki zajaviła, što zachop El Mienča praviała armija pry padtrymcy Nacyjanalnaj hvardyi i VPS. Minabarony adznačyła, što danyja, jakija spryjali padrychtoŭcy apieracyi, byli atrymany ad ZŠA.
Pres-sakratar Biełaha doma Kerałajn Levit paćvierdziła, što ZŠA pradastavili Mieksicy raźvieddanyja. Jana dadała, što administracyja Donalda Trampa «vykazvaje ŭdziačnaść i padziaku mieksikanskim vajskoŭcam za supracoŭnictva i paśpiachovaje praviadzieńnie hetaj apieracyi».