Amierykanku, jakaja napisała dziciačuju knihu pra sum paśla śmierci muža, abvinavačvajuć u jaho zabojstvie dziela hrošaj
Prakurory ŭ paniadziełak pradstavili maci sa štata Juta i aŭtarku dziciačych knih Koŭry Ryčyns jak žorstkuju zabojcu, jakaja imkniecca da hrošaj, u toj čas jak abaroncy zaklikali žury nie rabić vysnovaŭ da taho, jak sprava budzie pradstaŭlena ź jaje hledzišča, piša AP.
Skrynšot videa AP Press
Koŭry Ryčyns, 35 hadoŭ, abvinavačvajecca ŭ šerahu ciažkich złačynstvaŭ za toje, što jana nibyta zabiła svajho muža Eryka Ryčynsa fientaniłam u sakaviku 2022 hoda ŭ ich domie niepadalok ad łyžnaha kurorta Park-Sici. Jana nastojliva admaŭlaje ŭsie abvinavačańni.
Prakurory śćviardžajuć, što jana padsypała piać razoŭ latalnuju dozu sintetyčnaha apijatu ŭ kaktejl, jaki jon vypiŭ. Jana taksama abvinavačvajecca ŭ tym, što sprabavała jaho atrucić miesiacam raniej na Dzień śviatoha Valancina, nasypaŭšy fientaniłu ŭ sendvič. Paśla hetaha jon zajmieŭ vysypańni na skury i straciŭ prytomnaść, jak pakazvajuć sudovyja dakumienty.
Paśla śmierci muža Koŭry Ryčync sama vydała dziciačuju knihu pra sum u nadziei dapamahčy svaim synam i inšym dzieciam spravicca sa strataju baćki.
Na pasiadžeńni suda Ryčync siadzieła pobač sa svaimi advakatami, robiačy zapisy i pieradajučy niekatoryja im. Jaje abarona nie paviedamiła, ci budzie jana davać pakazańni ŭ svajoj abaronie.
Prakuror akruhi Samit Bred Błedvart skazaŭ žury, što Ryčyns była ŭ daŭhach na 4,5 miljona dalaraŭ i pamyłkova ličyła, što kali jaje muž pamre, jana ŭnaśleduje jaho majomaść, jakaja aceńvajecca bolš čym u 4 miljony dalaraŭ. Prakurory śćviardžajuć, što jana płanavała budavać novaje žyćcio ź inšym mužčynam, ź jakim tajemna sustrakałasia.
«Prakuratura zmoža dakazać, što Koŭry Ryčyns zabiła Eryka dziela hrošaj i dla taho, kab pačać novaje žyćcio, — skazaŭ Błedvart. — Bolš za ŭsio jana chacieła jaho hrošy, kab padtrymać svaju iluziju pryvileju, zamožnaści i pośpiechu».