Kim Čen Yn pryznačyŭ svaju 13‑hadovuju dačku na kiraŭničuju pasadu ŭ vojsku

Pavodle paviedamleńniaŭ paŭdniovakarejskich ŚMI sa spasyłkaj na ŭradavyja krynicy, kiraŭnik KNDR Kim Čen Yn pryznačyŭ svaju 13‑hadovuju dačku na kiraŭničuju pasadu va Upraŭleńni rakietnych sił — struktury, jakaja kuryruje jadzierny patencyjał krainy.

Jak śćviardžajecca, havorka idzie pra pasadu ŭzroŭniu kiraŭnika viedamstva. Pavodle infarmacyi krynic, Kim Čžu E pastupova rychtujuć da mahčymaj budučaj roli ŭ kiraŭnictvie Karejskaj narodnaj armii: jaje znajomiać z dakładami hienierałaŭ, a ŭ asobnych vypadkach jana nibyta addaje rasparadžeńni zamiest aficyjnaha kiraŭnika ŭpraŭleńnia.

Hetyja paviedamleńni źjavilisia na fonie Dziaviataha źjezda Pracoŭnaj partyi Karei, padčas jakoha Kim Čen Yna znoŭ abrali hienieralnym sakratarom partyi — hetuju pasadu jon zajmaje ŭžo 15 hadoŭ. U rezalucyi źjezda padkreślivajecca, što pad jaho kiraŭnictvam vojska krainy stała mocnym i hatovym supraćstajać lubym pahrozam.

Raniej Nacyjanalnaja raźviedvalnaja słužba Paŭdniovaj Karei nazyvała Kim Čžu E najbolš vierahodnaj spadkajemnicaj ułady. Jaje častyja publičnyja źjaŭleńni razam z baćkam, u tym liku padčas vyprabavańniaŭ balistyčnych rakiet, uzmacnili razmovy pra mahčymuju pieradaču ŭłady. Kali heta adbudziecca, to stanie biesprecedentnym krokam, bo raniej u dynastyi Kimaŭ ułada pieradavałasia pa mužčynskaj linii.

Kamientary da artykuła