«Vielmi nastojliva pracujem»: Tramp zrabiŭ novuju zajavu pra zakančeńnie vajny va Ukrainie

Pavodle słoŭ prezidenta ZŠA, na vajnie va Ukrainie štomiesiac hinuć 25 tysiač sałdat.

Fota: Kenny Holston-Pool/Getty Images

Donald Tramp zajaviŭ, što jaho kraina nastojliva pracuje nad zaviaršeńniem vajny RF suprać Ukrainy. Pra heta jon skazaŭ padčas vystupleńnia na sumiesnym pasiadžeńni abiedźviuch pałat Kanhresa, paviedamlaje Reuters.

Tramp čarhovy raz nahadaŭ, što, na jaho dumku, vajna nikoli b nie pačałasia, kali b jon byŭ prezidentam.

«I my vielmi nastojliva pracujem, kab skončyć hetuju žudasnuju vajnu, zabojstvy i raźniu pamiž Rasijaj i Ukrainaj, dzie dvaccać piać tysiač sałdat hinuć štomiesiac. Padumajcie pra heta — dvaccać piać tysiač sałdat hinuć kožny miesiac. Vajna, jakoj nikoli b nie było, kali b ja byŭ prezidentam», — padkreśliŭ amierykanski lidar.

Raniej śpiecyjalny pasłańnik prezidenta ZŠA Styŭ Uitkaf rastłumačyŭ, pry jakich umovach Ukraina i RF mohuć zaklučyć mirnaje pahadnieńnie. Pavodle jaho słoŭ, nie moža być nijakaj mirnaj damovy, pakul ukraincy nie buduć adčuvać, što kanflikt nie paŭtorycca znoŭ.

«I našy pratakoły biaśpieki raspracavanyja dla taho, kab ludzi mieli mocnaje adčuvańnie, što jany zmohuć žyć u miry, mieć budučyniu dla svaich dziaciej, nie sutykacca z takim hvałtam pamiž dźviuma krainami i što hety kanflikt bolš nikoli nie paŭtorycca», — adznačyŭ Uitkaf.

U toj ža čas prezident Uładzimir Zialenski adreahavaŭ na čutki pra novy dedłajn dla zaviaršeńnia vajny ad Trampa. Jon padkreśliŭ, što Ukraina zaŭsiody padtrymlivała chutki trek, heta značyć chutkaje zakančeńnie vajny.

«Što da 4 lipienia, što ZŠA abo prezident Tramp chočuć skončyć vajnu. Ja mahu tolki padtrymać, kali pra heta skazaŭ prezident ZŠA. Dla mianie heta novaja infarmacyja», — adznačyŭ Zialenski.

Kamientary da artykuła