Rasijski muž dla ŭnučki Łukašenki. Dačka Dźmitryja Łukašenki i Hanny Siałuk vyjšła zamuž
Anastasija Łukašenka, unučka Alaksandra Łukašenki, padčas vučoby ŭ Maskoŭskim dziaržaŭnym univiersitecie znajšła sabie abrańnika, vyśvietliła «Biuro».
Anastasija Łukašenka. Krynica: «UKantakcie»
Letam 2025 hoda Anastasija Łukašenka skončyła bakałaŭryjat jurfaka MDU. U Maskvie Anastasija Łukašenka nie tolki atrymała dypłom, ale i znajšła sabie paru.
Abrańnikam unučki Łukašenki staŭ 22-hadovy Dźmitryj Jelisiejeŭ — uradženiec Orska Arenburhskaj vobłaści Rasii.
Dźmitryj Jelisiejeŭ. Krynica: profil Dźmitryja Jelisiejeva va «UKantakcie»
Paśla zakančeńnia siaredniaj škoły junak u 2021 hodzie pastupiŭ na jurydyčny fakultet MDU na kafiedru pradprymalnickaha prava. Tady ž u VNU pastupiła i Anastasija Łukašenka.
Viasnoj 2024 hoda svaje stasunki para ŭžo nie chavała. U kancy krasavika 2024‑ha Anastasija Łukašenka arhanizavała pajezdku ŭ Minsk dla kaleh pa dobraachvotnaj studenckaj družynie jurfaka MDU (DSD). U składzie delehacyi apynuŭsia i Jelisiejeŭ.
Voś, naprykład, jany trymajucca za ruki ŭ Pałacy niezaležnaści.
Voś jany pazirujuć padčas ahladnaj prahułki pa Minsku.
Na nastupny dzień maładyja ludzi praciahnuli abdymacca padčas ekskursii ŭ cechu zavoda «Kamunarka».
Anastasija Łukašenka i Dźmitryj Jelisiejeŭ na ekskursii pa zavodzie «Kamunarka». Krynica: law.msu.ru
Dziakujučy «Kibierpartyzanam» rasśledavalniki atrymali dadzienyja avijapieralotaŭ Anastasii Łukašenki i Dźmitryja Jelisiejeva rasijskaj dziaržaŭnaj avijakampanijaj «Aerafłot». Ź ich daviedalisia, što Jelisiejeŭ jašče niekalki razoŭ nanosiŭ vizity ŭnučcy Łukašenki ŭ Biełarusi.
U nastupny raz Jelisiejeŭ prylacieŭ u Minsk padčas letnich vakacyj 9 lipienia 2024 hoda — u dzień adkryćcia «Słavianskaha bazaru» ŭ Viciebsku. U Biełarusi jon pravioŭ jak minimum tydzień. Takuju vysnovu možna zrabić zychodziačy z fotaspravazdačy z kancerta Viktoryi Aleški, jaki prajšoŭ u Viciebsku 14 lipienia — unučka Łukašenki i jaje abrańnik trapili na zdymak, kali siadzieli razam.
Anastasija Łukašenka i Dźmitryj Jelisiejeŭ na «Słavianskim bazary» ŭ Viciebsku. Krynica: fest-sbv.gck.by
A ŭ navahodnija vakacyi 2025 hoda Anastasija i Dźmitryj znoŭ trapili ŭ abjektyŭ — na hety raz karespandenta «Minskaj praŭdy».
Anastasija Łukašenka i Dźmitryj Jelisiejeŭ na kancercie ŭ salihorskaj šachcie. Krynica: mlyn.by
23 lipienia 2025 hoda Anastasija Łukašenka i Dźmitryj Jelisiejeŭ prylacieli ŭ Minsk z Maskvy adnym rejsam. Bilety braniravaŭ sam Dźmitryj praź biełaruskaje turahienctva «Ałantur».
Za miesiac da taho, u červieni 2025 hoda, Anastasija Łukašenka naniesła vizit u Orsk: 8 červienia jana i Dźmitryj Jelisiejeŭ vylecieli z Maskvy na radzimu bojfrenda, dzie žyvie jahonaja siamja.
«Biuro» maje padstavy mierkavać, što ŭ letnija miesiacy 2025 hoda ŭnučka Łukašenki i Dźmitryj Jelisiejeŭ zarehistravali šlub.
Rasśledavalniki vyvučyli fotazdymki i videa ŭ pablikach. Voś videa za luty 2025 hoda. Na biezymiennym palcy pravaj ruki źjaviŭsia zaručalny piarścionak.
Hety ž piarścionak zaŭvažyli na ruce ŭnučki Łukašenki ŭ krasaviku 2025 hoda.
Anastasija Łukašenka na schodzie DSD. Krynica: profil DSD va «UKantakcie»
U vieraśni Anastasija viartajecca na jurfak MDU ŭ jakaści pieršakurśnicy-mahistrantki. Ale ŭ pablikach jana ŭžo fihuruje jak Anastasija Jelisiejeva.
Jelisiejevaj jana taksama stała i na svajoj staroncy va «UKantakcie».
Rasśledavalniki zmahli vyśvietlić, što imavierny muž Anastasii Łukašenki maje ścipły «pasah» — adnapakajovuju kvateru ŭ Maskvie płoščaj 23 kv. m u ŽK «Vialikaja Ačakaŭskaja 2», za 20 chvilin jazdy ad hałoŭnaha korpusa MDU.
Žyllovaja płošča zapisanaja na jahonuju maci — Irynu Jelisiejevu. Jana žyvie ŭ Orsku i pracuje namieśnicaj dekana pa vychavaŭčaj pracy ŭ Orskim humanitarna-technałahičnym instytucie. Na jaje taksama zarehistravanaje IP, praź jakoje jana akazvaje pasłuhi repietytara.
Čym ciapier zajmajecca vypusknik jurfaka, nieviadoma, adnak u rasijskaj padatkovaj jon zarehistravany jak samazaniaty.