13‑hadovaja Alisa Cieplakova — dačka kamunista sa Škłova — skončyła ŭniviersitet. Ale da navukovaj pracy jość pytańni ŭ sistemy «Antypłahijat»

Dziaŭčyna abaraniła dypłomnuju pracu i ciapier tearetyčna moža pracavać pa śpiecyjalnaści piedahoh-psichołah.

Alisa Cieplakova. Skrynšot videa na YouTube-kanale «Vučymsia z Alisaj»

Pra heta ŭ Threads raspavioŭ Dzianis Narylnioŭ, jaki taksama sioleta skončyŭ Rasijski dziaržaŭny humanitarny ŭniviersitet.

Jon śćviardžaje, što Alisa Cieplakova dva hady była jaho adnahrupnicaj — u RDHU dziaŭčyna-vunderkind pieraviałasia ŭ 2023 hodzie (adrazu na druhi kurs), ale ž lekcyi nie naviedvała zusim.

Alisa Cieplakova. Fota: sajt woman.ru

A dniami jana abaraniła dypłomnuju pracu pa temie «Uzajemasuviaź asablivaściaŭ myśleńnia i emacyjnaj śfiery ŭ dziaciej 5‑7 hadoŭ». Praŭda, jak piša Dzianis, aryhinalnaść dypłoma Alisy skłała ŭsiaho 15%.

«Na abaronie navukovaja kiraŭnica ščyra skazała, što nie moža acanić asabisty ŭkład Alisy ŭ stvareńnie pracy praz vysokuju ŭciahnutaść u praces jaje baćkoŭ. Nizkuju aryhinalnaść śpisali na asablivaść pracy sistemy «Antypłahijat». Sama Alisa ŭžo paśla svajho vystupleńnia rastłumačyła nizkuju aryhinalnaść pamyłkaj pry zahruzcy pracy na pravierku — nibyta pracu zahruzili dvojčy, i druhi raz sistema pakazała vysoki pracent supadzieńnia ź jaje raniej zahružanaj pracaj. Na pytańni jana adkazvała razmyta, nievyrazna. Chacia, biezumoŭna, dziaŭčynku škada. Na pieradabaronie adkazvać na pytańni kamisii Alisie dapamahaŭ jaje asabliva adorany tata».

Niechta z adnahrupnikaŭ padzialiŭsia skrynšotam z Alisaj padčas zaniatkaŭ anłajn. Krynica: sajt woman.ru

Nahadajem: Alisa Cieplakova stała zorkaj u 2021 hodzie, kali va ŭzroście 9 hadoŭ pastupiła ŭ Maskoŭski dziaržaŭny ŭniviersitet na psichołaha — na płatnaje adździaleńnie, ale vynik usio roŭna ŭražvaŭ. Praŭda, tam adrazu pačalisia kanflikty pamiž baćkam vunderkinda i administracyjaj VNU.

Jaŭhien Cieplakoŭ

Tata dziaŭčyny — kamunist sa Škłova Jaŭhien Cieplakoŭ. U svoj čas jon ažaniŭsia z rasijankaj, paśpieŭ razam ź joj pažyć u Kitai (i vielmi maryŭ zastacca ŭ toj krainie, ale siamji pryjšłosia ŭsio ž viarnucca ŭ Rasiju).

Jaŭhien choča daryć śvietu hienijaŭ u pramysłovych maštabach. Jon maje svoj padychod i da adukacyi dziaciej, i da stvareńnia siamji. Ličyć, što dziaŭčaty ŭ 15 hadoŭ mohuć skončyć univiersitet i pačynać naradžać dziaciej.

Siamja Cieplakovych u 2021 hodzie. Fota: e1.ru

U siamji Cieplakovych užo dzieviać dziaciej. Jaŭhien raskazaŭ, što jaho druhi syn Chiejmdal pastupiŭ u VNU ŭ 8 hadoŭ. Jašče adna dačka — Leja — skončyła 11 kłasaŭ škoły ŭ takim samym uzroście.

Jaŭhien Cieplakoŭ vychvalaŭsia tym, što jaho dzieci vučacca ŭ niekalkich VNU adnačasova.

Niekalki hadoŭ tamu sajt mogilev.media pisaŭ, što i Alisa, i Chiejmdal — studenty Biełaruska-Rasijskaha ŭniviersiteta, jaki znachodzicca ŭ Mahilovie.

Pavodle infarmacyi vydańnia, Alisa zavočna vučyłasia pa śpiecyjalnaści «Aŭtamatyzavanyja sistemy apracoŭki infarmacyi», a jaje brat Chiejmdal pa śpiecyjalnaści «Elektronny markietynh» (taksama zavočna).

Sioleta ŭ ŚMI źjaŭlałasia infarmacyja, što Alisa, Chiejmdal i Leja vučacca taksama ŭ Maskoŭskim aŭtamabilna-darožnym dziaržaŭnym techničnym univiersitecie. Alisa na fakultecie «Technałohija transpartnych pracesaŭ», a Chiejmdal i Leja na śpiecyjalnaści «Naziemnyja transpartna-technałahičnyja srodki».

Kamientary da artykuła