Spyniaje pracu «Dom Bresckaha busła», jaki zajmaŭsia ratavańniem ptušak
Kiraŭnik centra dapamohi ptuškam i žyviołam «Dom Bresckaha busła» Dźmitryj Aŭdziejeŭ paviedamiŭ, što ŭstanova budzie likvidavanaja. Hałoŭnaj pryčynaj stała prablema ź ziamielnym učastkam pad Brestam, piša Telegraf.news.
Skrynšot ź videa
Častka valjeraŭ, dzie ŭtrymlivalisia ptuški (nie tolki biełyja busły, ale i lebiedzi, sovy, kaniuki dy inšyja), znachodziłasia na susiednim učastku, jaki raniej brali ŭ arendu. Sioleta termin arendy skončyŭsia, i ŭładalniki ziamli admovilisia jaho praciahvać, bo płanujuć budavać tam žyły dom.
Aŭdziejeŭ źviarnuŭsia ŭ Brescki rajvykankam z prośbaj vydzielić dadatkovuju ziamlu ŭ susiedniaj vioscy, ale atrymaŭ admovu. Jamu prapanavali ŭčastak za 26 kiłamietraŭ ad ciapierašniaha miesca.
Takoje rašeńnie kiraŭnika centra nie zadavoliła. Jon tłumačyć, što ŭ jaho niama słužbovaha transpartu, kab štodzionna jeździć tak daloka i dahladać ptušak. Akramia taho, novaja miascovaść nie padychodzić dla reabilitacyi busłoŭ, bo tam jany nie hniazdujucca. Biez kantaktu ž ź dzikimi ptuškami sacyjalizacyja maładych asobin niemahčymaja.
Centr zajmaŭsia nie pastajannym utrymańniem ptušak, a ich vychodžvańniem i viartańniem u pryrodu. Tudy traplali buślaniaty, vykinutyja z hniozdaŭ u «hałodnyja» hady, ptuški z traŭmami abo tyja, što nie zmahli svoječasova adlacieć na zimoŭku. Paśla adnaŭleńnia ich vypuskali na volu. Pierad hetym busłoŭ kalcavali dla ŭliku.
Niadaŭna ŭ centry vyratavali i vypuścili savu, jakuju znajšli ŭ adnym ź dziciačych sadkoŭ u ciažkim stanie z abiazvodžvańniem.
Dźmitryj Aŭdziejeŭ pryznaŭsia, što da apošniaha sprabavaŭ zachavać prajekt, ale abstaviny akazalisia macniejšymi. U najbližejšy čas jon płanuje padać dakumienty na likvidacyju «Doma Bresckaha busła».
Centr i jaho padapiečnyja nie raz stanavilisia viadomymi ŭ sacyjalnych sietkach. Naprykład, videa z busłom Jašam, jaki zamiest samastojnaha palavańnia vyprošvaŭ ježu i navat załaziŭ na dach aŭtamabila, nabrała miljony prahladaŭ.