Iran aficyjna paćvierdziŭ hibiel ajatały Ali Chamieniei. Abvieščana 40‑dzionnaja žałoba
Iranskaje dziaržaŭnaje infarmacyjnaje ahienctva IRNA nočču 1 sakavika vystupiła z aficyjnaj zajavaj ab hibieli Viarchoŭnaha lidara krainy ajatały Ali Chamieniei. Ułady Irana nazvali toje, što zdaryłasia, žorstkim napadam złačynnych režymaŭ, abviaścili ŭ krainie sarakadzionnuju žałobu, siem dzion aficyjnych vychadnych, a taksama paabiacali adkaz ZŠA i Izrailu.
Ali Chamieniei. Fota: AP Photo / Vahid Salemi, File
«Z hłybokim žalem i smutkam paviedamlajem vam, što ŭ vyniku žorstkaha napadu złačynnaha ŭrada Amieryki i złaviesnaha sijanisckaha režymu, uzor viery, džychadu i supracivu, Viarchoŭny lidar Isłamskaj revalucyi, jaho śviataść ajatała Ali Chamieniei pryniaŭ pakutnickuju śmierć», — havorycca ŭ paviedamleńni.
U krainie abviaścili 40 dzion žałoby i siem dzion aficyjnych vychadnych.
Ali Chamieniei, jakomu było 86 hadoŭ, zajmaŭ pasadu najvyšejšaha kiraŭnika Irana z 1989 hoda. Jon vałodaŭ absalutnaj uładaj, jakaja pieravyšaje paŭnamoctvy prezidenta. Jon niepasredna kantralavaŭ armiju, śpiecsłužby, sudovuju sistemu i Korpus vartavych isłamskaj revalucyi (KVIR).
U aficyjnym paviedamleńni dziaržaŭnych ŚMI Chamieniei nazyvajuć uzoram viery i supracivu, jaki bolš za 37 hadoŭ uznačalvaŭ isłamski front suprać tyranii.
Iranskaje infarmahienctva IRNA taksama paćvierdziła hibiel savietnika zabitaha Ali Chamieniei — sakratara Savieta pa abaronie Irana Ali Šamchani, a taksama kamandujučaha iranskim Korpusam vartavych Isłamskaj revalucyi Machamada Pakpura.
Prezident Irana Masud Piezieškijan u apublikavanaj zajavie paabiacaŭ adpomścić za śmierć Chamieniei. «Hetym razam my z usioj siłaj i ćviordaściu prymusim vykanaŭcaŭ i zakazčykaŭ hetaha vialikaha złačynstva paškadavać», — zapeŭniŭ jon.
Doŭhi čas iranski bok admaŭlaŭ śmierć Chamieniei.
U subotu viečaram pra jaho likvidacyju spačatku paviedamili mižnarodnyja ahienctvy sa spasyłkaj na izrailskich čynoŭnikaŭ, a zatym adpaviednuju zajavu zrabiŭ prezident ZŠA Donald Tramp. Tehieran da apošniaha momantu abviarhaŭ hetyja źviestki.
Na fonie aficyjnaj žałoby ŭ sacyjalnych sietkach pačali raspaŭsiudžvacca videakadry, na jakich žychary roznych iranskich haradoŭ śviatkujuć śmierć kiraŭnika.
Iranskija dziaržaŭnyja ŚMI publikujuć šmattysiačnyja natoŭpy, što harujuć praź śmierć Chamieniei.
Vajennaja apieracyja ZŠA i Izraila pačałasia ranicaj u subotu i była nakiravana na źniščeńnie vajennych abjektaŭ i klučavych fihur siłavych struktur Irana.
U adkaz na hetyja dziejańni Tehieran ździejśniŭ masiravany abstreł z vykarystańniem rakiet i dronaŭ. Pad udar trapiŭ nie tolki Izrail, ale i susiednija krainy Piersidskaha zaliva. Asnoŭnymi mišeniami iranskich vajskoŭcaŭ stali amierykanskija bazy, adnak u vyniku paciarpieli i cyvilnyja abjekty: žyłyja damy, hateli i aeraporty ŭ rehijonie.