Na pałac Chamieniei skinuli 30 bombaŭ
Izrail i ZŠA čakali redkaj mahčymaści nanieści ŭdar pa viarchoŭnamu lidaru Irana Ali Chamieniei i jaho hałoŭnych daradcach u jaho pałacy, i jany dačakalisia, raspaviadaje padrabiaznaści The Wall Street Journal biez spasyłak na krynicy.
Subotnija ataki adbylisia pry dzionnym śviatle. Fota: AP
Izrailskaja i amierykanskaja vajennaja raźviedka daŭno nazirali i čakali redkaj mahčymaści: sustrečy vyšejšych palityčnych i vajskovych lidaraŭ Irana, na jakoj ich usich možna było b źniščyć adnym razam. Hety dzień narešcie nastaŭ u subotu, piša vydańnie.
Supracoŭniki raźviedki vyjavili nie adnu takuju sustreču, a try. I jany dakładna vyznačyli miescaznachodžańnie Viarchoŭnaha lidara ajatały Ali Chamieniei.
Momant byŭ nastolki ŭnikalnym, što amierykanskija i izrailskija vajennyja samaloty nanieśli ŭdar siarod biełaha dnia. Izrailskija samaloty skinuli 30 bombaŭ na rezidencyju Chamieniei, pakinuŭšy jaje vypalenaj i razburanaj.
Na spadarožnikavym zdymku bačny stan rezidencyi Viarchoŭnaha lidara Irana Ali Chamieniei paśla ataki
Izrail taksama zajaviŭ, što zabili šerah inšych vysokapastaŭlenych palityčnych i vajennych čynoŭnikaŭ, u tym liku Ali Šamchani, hałoŭnaha savietnika Chamieniei pa biaśpiecy; Machamada Pakpura, kamandujučaha Korpusam vartavych Isłamskaj revalucyi; i ministra abarony Amira Nasirzade.