U Izraili zajavili pra ŭdar pa iranskim abjekcie, na jakim raspracoŭvali jadziernuju zbroju

Pradstaŭnik Armii abarony Izraila (CACHAŁ) paviedamiŭ, što izrailskija vajskoŭcy nanieśli ŭdar pa sakretnym jadziernym abjekcie ŭ Iranie, jaki nazyvajecca Min-Zadai. Pavodle jaho słoŭ, na hetym kompleksie hrupa iranskich navukoŭcaŭ nibyta tajemna pracavała nad raspracoŭkaj klučavoha elemienta sistemy jadziernaj zbroi.

Skrynšot ź videa

U izrailskaj armii śćviardžajuć, što paśla 12‑dzionnaha kanfliktu pamiž Izrailem i Iranam u červieni 2025 hoda Tehieran nie spyniŭ svaju vajskovuju jadziernuju prahramu. Naadvarot, raboty praciahvalisia, a častka infrastruktury była pieraniesiena ŭ padziemny abjekt, jaki ličycca bolš abaronienym ad avijaŭdaraŭ.

Taksama paviedamlajecca, što izrailskaja raźviedka nazirała za dziejnaściu navukoŭcaŭ i zmahła vyznačyć ich miescaznachodžańnie, što dazvoliła nanieści dakładny ŭdar pa kompleksie.

Pradstaŭnik CACHAŁ zajaviŭ, što hetaja ataka istotna asłablaje mahčymaści Irana dla stvareńni jadziernaj zbroi i źjaŭlajecca častkaj sieryi dziejańniaŭ u miežach apieracyi «Am Kałavi», nakiravanaj na likvidacyju jadziernaj pahrozy z boku Irana.

Kamientary da artykuła