Pucin namiaknuŭ, što moža sam pierastać pastaŭlać Jeŭropie haz prosta ciapier

Prezident Rasii Uładzimir Pucin dapuściŭ mahčymaść spynieńnia pastavak rasijskaha hazu ŭ Jeŭropu, nie čakajučy ŭviadzieńnia novych abmiežavańniaŭ z boku Jeŭrasajuza, paviedamlaje The Moscow Times.

Uładzimir Pucin. Fota: Alexander Kazakov, Sputnik, Kremlin Pool Photo via AP

Adkazvajučy na pytańnie prapahandysta Paŭła Zarubina, Pucin adznačyŭ rost cen na haz u Jeŭropie i zajaviŭ, što heta źviazana nie sa skaračeńniem abjomaŭ pastavak, a z pavieličeńniem kolkaści pakupnikoŭ u inšych rehijonach na fonie kryzisu na Blizkim Uschodzie.

Sa słoŭ Pucina, kali źjaŭlajucca bolš vyhadnyja rynki, to pastaŭščyki naturalna pieraaryjentujucca tudy, dzie płaciać bolš.

U hetym kantekście jon zhadaŭ pra płany Jeŭrasajuza ab pastupovym abmiežavańni impartu rasijskaha hazu. Vydadzienyja im pradpisańni praduhledžvajuć zabaronu na pastaŭki zvadkavanaha pryrodnaha hazu pavodle karotkaterminovych kantraktaŭ z krasavika 2026 hoda i pavodle doŭhaterminovych — z pačatku 2027 hoda. Taksama z 2027 hoda płanujecca poŭnaja admiena impartu trubapravodnaha hazu z Rasii.

Pucin adznačyŭ, što kali pastaŭki ŭsio adno buduć zabaronienyja ŭ najbližejšy čas, to Rasii, na jaho dumku, mahčyma, varta samastojna spynić ich i pieranakiravać ekspart u krainy, jakija ličacca nadziejnymi partniorami.

Jon dadaŭ, što heta tolki razvažańnie, i paviedamiŭ pra daručeńnie ŭradu prapracavać pytańnie pieraaryjentacyi pastavak na inšyja rynki.

Pavodle analityčnych źviestak, u 2025 hodzie dola rasijskaha hazu ŭ ahulnym imparcie ES skłała kala 12%. Najbujniejšymi pastaŭščykami hazu ŭ Jeŭrasajuz zastajucca Narviehija, ZŠA i Ałžyr. Raniej Rada ES uchvaliła płan paetapnaj admovy ad impartu rasijskaha hazu, jakaja pavinna zakončycca da 2028 hoda.

Kamientary da artykuła