Paśla ataki ŭ Mižziemnym mory rasijskija ZPH-tankiery mianiajuć maršruty

Paśla ataki ŭ Mižziemnym mory rasijskija tankiery, jakija pieravoziać zvadkavany pryrodny haz, pačali źmianiać svaje maršruty. Adzin ź ich — tankier «Buran» z hruzam z prajekta «Arktyk SPH-2» — admoviŭsia zachodzić u Mižziemnaje mora i nakiravaŭsia ŭ abychod Afryki, vybraŭšy značna bolš doŭhi šlach. Inšy tankier, Arctic Pioneer, jaki viartaŭsia z Kitaja biez hruzu, spyniŭsia kala ŭźbiarežža Jehipta, piša Reuters.

Hazavoz Arctic Pioneer. Zdymak ilustracyjny. Fota: vesselfinder.com

3 sakavika kala bierahoŭ Livii ŭ Mižziemnym mory byŭ patopleny jašče adzin tankier, što pracavaŭ dla taho ž prajekta, — Arctic Metagaz. Pavodle paviedamleńniaŭ, sudna atakavali marskija bieśpiłotnyja katary i drony. Ekipaž udałosia vyratavać.

Rasijskija ŭłady zajavili, što za napadam nibyta staić Ukraina, i nazvali heta mižnarodnym teraryzmam i marskim piractvam. Ukrainski bok adkaznaść za incydent nie pryznaŭ.

Strata navat adnaho takoha sudna ličycca surjoznaj prablemaj dla prajekta «Arktyk SPH-2», jaki ŭžo znachodzicca pad zachodnimi sankcyjami. U adroźnieńnie ad naftavych tankieraŭ, u śviecie adnosna mała śpiecyjalnych hazavozaŭ, tamu chutka zamianić ich składana.

Patopleny tankier byŭ pabudavany jašče ŭ 2003 hodzie, ale ŭsio adno zastavaŭsia važnaj častkaj fłotu. Tankier «Buran» naležyć da apošniaj sieryi arktyčnych hazavozaŭ, jakija kampanija atrymała ŭ Paŭdniovaj Karei ŭ 2023 hodzie.

Analityki adznačajuć, što pahroza novych atak prymušaje rasijski fłot, jaki vykarystoŭvajecca dla pieravozki hazu ŭ abychod sankcyj, mianiać maršruty. Heta jašče bolš uskładniaje ekspart z prajekta «Arktyk SPH-2».

Faktyčna adzinym pakupnikom hazu z hetaha prajekta ciapier źjaŭlajecca Kitaj, jaki atrymlivaje jaho pa składanaj łahistyčnaj schiemie i, jak miarkujecca, pa davoli nizkaj canie.

Kamientary da artykuła