«Ukłaŭ 120% ad koštu i nie škaduju». Biełarus kupiŭ mašynu mary za $2000 i vydatkavaŭ na ramont jašče bolš
Kupić aŭtamabil za $2000, ukłaści ŭ jaho jašče $2500 i atrymać na vychadzie mašynu, jakaja na rynku kaštuje maksimum $3000. Z punktu hledžańnia zdarovaha sensu — varjactva. Ale dla Dźmitryja z Mahilova hety jarka-čyrvony Citroën staŭ padarunkam samomu sabie z 2006-ha. Myfin paličyŭ usie vydatki: ad pieravarki dnišča i Bi-LED modulaŭ da samarobnych dyvankoŭ i aryhinalnych dyskaŭ, jakija pryjšłosia šukać pa ŭsioj krainie.
Aŭtamabil mary kaštavaŭ 15 000 dołaraŭ, a ŭ kišeni było tolki dźvie
U 2006 hodzie Dźmitryj pajechaŭ kuplać svoj pieršy aŭtamabil z Mahilova ŭ Minsk na aŭtarynak u Malinaŭcy.
Prachodziačy mima aŭtasałona, jon na chvilinu zamier kala vitryny: za škłom źziaŭ novy jarka-čyrvony Citroën Xsara. Dźmitryj zirnuŭ na ceńnik i, uśmichnuŭšysia, pajšoŭ dalej. Aŭtamabil kaštavaŭ 15 000 dalaraŭ, a ŭ kišeni ŭ jaho było tolki dźvie. Na ich jon i kupiŭ svajho «pieršynca» — piatnaccacihadovy Ford Escort.
Za nastupnyja dvaccać hadoŭ Dźmitryj źmianiŭ niekalki mašyn. Rabota i rytm žyćcia patrabavali pastajannaj mabilnaści, tamu z časam jon pryjšoŭ da formuły «asnoŭny aŭtamabil plus padmienny». Dziesiać hadoŭ tamu jon spyniŭsia na dvuch varyjantach: siamimiesnym Logan MCV dla vialikich zadač i kampaktnym Opel Astra na padchvacie.
«Da 2024 hoda resurs miechaniki i kuzava staroha Opel byŭ vyčarpany, i ja ŭspomniŭ pra toj samy čyrvony Citroën ź junactva, — kaža Dźmitryj. — Pošuki pačalisia. Na rynku znajšłosia kala dvuch dziasiatkaŭ prapanoŭ u dyjapazonie ad 1000 da 3000 dalaraŭ. Kryteryi kupli byli strohimi: tolki piacidźvierny chetčbek, abaviazkova čyrvony koler i kamplektacyja nie nižejšaja za tuju, ź vitryny. Ekzemplar, jaki pasavaŭ, znajšoŭsia ŭ Homieli za 2000 dalaraŭ».
Stan techniki žadaŭ lepšaha, ale mašynu vyratavali jakasnaja afarboŭka i redki dla tych hadoŭ kamfort: padahreŭ siadzieńniaŭ, klimat-kantrol, multyrul i poŭny elektrapakiet.
«Mety stvaryć muziejny ekspanat nie było»
Adrazu paśla kupli Citroën adpraviŭsia na reanimacyju. Try miesiacy syšło na poŭnaje TA i pieravarku dnišča.
Biudžet adnaŭleńnia skłaŭ:
- zvaračnyja raboty i absłuhoŭvańnie 1500 rub.
- novyja parohi 200 rub.
- płastykavyja piarednija kryły 440 rub.
- farbavańnie elemientaŭ 400 rub.
«Mety stvaryć muziejny ekspanat nie było. Patrebny byŭ nadziejny pracoŭny konik. Kab mašyna nie padvodziła, zamianili ŭsie vadkaści, ramiani, radyjatar z patrubkami i sčapleńnie, jakoje buksavała jašče pry ahladzie. Heta dadało da kaštarysu jašče 1000 rubloŭ. Z majsterni pajechaŭ da elektrykaŭ. Za 200 rubloŭ jany ažyvili centralny zamok i prybrali pamyłki pa elektronicy ruchavika».
Śledam uźnikła dylema z optykaj. Rodnyja karektary far byli złamanyja. Para novych aryhinalnych far kaštavała kałasalnyja 1500 rubloŭ, tamu Dzima vyrašyŭ sekanomić i ŭziaŭ repliku siaredniaj jakaści za 500 rubloŭ. Ale skupy płacić dvojčy — śviatło akazałasia žudasnaje.
«Pryjšłosia ŭskryvać korpus u profilnym servisie, dzie vyśvietliłasia, što fary sabranyja z zavodskim brakam. Prablemu vyrašyli radykalna ŭstanoŭkaj Bi-LED modulaŭ za 1000 rubloŭ. Finalnym štrychom stali ščotki Bosch Aero Twin za 180 rubloŭ».
«Pačałosia palavańnie za aryhinalnymi dyskami R15, jakija bačyŭ u aŭtasałonie 20 hadoŭ tamu»
Kali techničnaja častka była zakryta, pryjšoŭ čas chaciełak.
«Na miesca štatnych staražytnych dynamikaŭ i niepracujučaj mahnitoły ŭstali čatyry novyja kampanienty i hałava Prology — pa 300 rubloŭ za akustyku i pryładu. Pačałosia doŭhaje palavańnie za tymi samymi aryhinalnymi dyskami R15, jakija bačyŭ u aŭtasałonie 20 hadoŭ tamu. Kamplekt znajšoŭsia ŭ Minsku za 300 rubloŭ, na ich abuli novuju «Biełšynu» jašče za 440».
Kab multyrul byŭ jašče bolš funkcyjanalny, Dzima za dzień samastojna pierapajaŭ rezistary ŭ knopkach, pasiabravaŭšy ich z novaj mahnitołaj, i vyvieŭ mikrafon dla hučnaj suviazi.
Śpis dapracovak papoŭnili bahažnyja papiaročki na dach (300 rub.) i novy čachoł KPP z ekaskury (50 rub.). Navat kluč zapalvańnia nie zastaŭsia biez uvahi nasupierak paradam majstroŭ sekanomić i zrabić zvyčajny dublikat. Dzima addaŭ 300 rubloŭ za sučasny kluč z ubudavanymi knopkami kiravańnia centralnym zamkom. Estetyka i zručnaść akazalisia važniejšyja.
Daviadzieńnie da ładu zakranuła kožnuju drobiaź: zamok bardačka (20 rub.), hazavyja ŭpory kapota i bahažnika (150 rub.), rele abahrevu škła (20 rub.). Niaspraŭnuju prybornuju panel zamianili (50 rub.), a štatnyja dyvanki Dzima zrabiŭ sam, kupiŭšy vorsavy materyjał u «Viciebskich dyvanach» (60 rub.).
«Heta zakryty hieštalt, mahčymaść pacisnuć ruku samomu sabie»
Vynik akazaŭsia niečakany. Citroën kuplaŭsia jak zapasny varyjant, ale staŭ asnoŭnym. Vialiki siamimiesny Logan MCV ciapier bolšuju častku času staić u haražy, sastupajučy miesca chetčbeku. Praz dva hady paśla kupli bujnyja ŭkładańni skončylisia, ciapier mašyna patrabuje tolki redkaj uvahi pa drobiaziach.
«Kali padbić debiet z kredytam, matematyka atrymlivajecca śpiecyfičnaja. Kupla abyšłasia ŭ 2000$, a ŭvieś ramont u rajonie 7730 rubloŭ (prykładna $2400—$2500 pa siarednim kursie za pieryjad rabot — zaŭv.). I heta biez uliku drobiaziaŭ i asabistaha času».
Pry hetym siońnia taki Citroën Xsara ŭ samym dobrym stanie naŭrad ci sydzie daražej za 3000$. Z punktu hledžańnia pierakupu ci racyjanalnaha kiroŭcy — ździełka sumnieŭnaja, kali nie skazać pravalnaja.
Ale kali Dzima sadzicca za rul, jon bačyć nie stary francuzski chetčbek ź pieravaranymi parohami, a tuju samuju jarka-čyrvonuju maru za vitrynnym škłom. U 2006‑m hetyja 15 000 dalaraŭ byli bahaćciem i biletam u inšaje žyćcio. Praz amal 20 hadoŭ jon usio ž taki kupiŭ sabie tyja samyja adčuvańni: i pravilny koler, i rodnyja dyski, i knopki na ruli.
«Heta zakryty hieštalt, mahčymaść pacisnuć ruku samomu sabie, maładomu i niebahatamu, i skazać: «Hladzi, my jaho ŭsio ž taki ŭziali». A za takoje nie škada ni lišniaj tysiačy dalaraŭ, ni vychodnych, praviedzienych z pajalnikam u rukach. Bo ŭ rešcie rešt my tracim hrošy nie na žaleza, a na radaść, jakuju jano daryć».