«Homiel — takaja vioska?» Hamialčanka aburyłasia praz afišu z rasijskimi artystami
«Ich naohuł niechta viedaje?»
Žycharka Homiela apublikavała ŭ TikTok videa z kancertnaj afišaj horada. Na joj možna ŭbačyć kancerty artystaŭ, jakija płanujuć vystupić u haradskim hramadska-kulturnym centry. Aŭtarka rolika źviarnuła ŭvahu, što na afišy — u asnoŭnym rasiejskija vykanaŭcy, i pryznałasia, što bolšaść ź ich joj nieviadomaja, piša BGmedia.
«Voś cikava, Homiel takaja vioska, što narmalnyja artysty da nas nie pryjazdžajuć? Dy niejki kašmar! Ich uvohule viedaje chto-niebudź? Chto-niebudź kupiŭ kvitki na ich kancert?» — kamientuje žančyna situacyju ŭ videa.
Na afišy vidać abjavy pra kancerty niekalkich rasiejskich vykanaŭcaŭ: Aleha Pahudzina i Valeryja Siomina. Videa chutka sabrała sotni kamientaroŭ, a mierkavańni karystalnikaŭ padzialilisia.
Asnoŭnaja dyskusija razharnułasia vakoł taho, ci sapraŭdy na afišy vystupajuć nieviadomyja artysty. Častka karystalnikaŭ paličyła, što aŭtarka pierabolšvaje i što mnohija vykanaŭcy davoli viadomyja — prosta nie ŭsie cikaviacca takoj muzykaj.
«Mnie 14, i prabačcie, žančyna, ale ja pałovu artystaŭ z afiš viedaju, navat bolšaść. Jak možna ich nie viedać? I čamu heta jany «nienarmalnyja»?»
Inšyja ž, naadvarot, padtrymali aŭtarku rolika i pryznalisia, što taksama amal nikoha nie paznajuć z kancertnaj afišy.
«Akramia Aŭsijenka nikoha nie viedaju».
«Kali b nie vaš rolik, dumaju, 80% rasiejcaŭ i biełarusaŭ navat nie daviedalisia b, chto heta naohuł».
Častka karystalnikaŭ pačała abmiarkoŭvać, čamu mienavita takija artysty vystupajuć u Biełarusi. Na ich dumku, niekatoryja rasiejskija vykanaŭcy prosta šukajuć mahčymaści dla hastrolaŭ u krainach, dzie ich jašče zaprašajuć.
«Zhodna! Sprava ŭ tym, što ŭ siabie jany ŭžo nie katujucca, a ŭ inšyja krainy, akramia Biełarusi, ich nie puskajuć. Usia estrada Rasiei ŭ nas hrošy zarablaje».
«Akramia Homiela ich nikudy nie kličuć».
Niekatoryja kamientatary nie strymlivali žartaŭ. Naprykład, karystalniki iranizavali z taho, chto kuplaje kvitki na takija kancerty.
«Bilety prafsajuzy kupili».
Byli i tyja, chto adznačyŭ, što ŭ Homiel sapraŭdy redka pryjazdžajuć viadomyja sučasnyja vykanaŭcy, tamu amataram papularnaj muzyki časta davodzicca jechać u stalicu.
«Časam dobryja muzyki pryjazdžajuć, ale redka. Na artystaŭ, jakija mnie padabajucca, adziny varyjant — jechać u Minsk. U Homiel nichto pryjazdžać nie choča».