Minčukoŭ papiaredzili, što nad imi budzie lotać viertalot

Žycharoŭ Minska papiaredzili, što najbližejšymi dniami nad horadam budzie lotać viertalot, jaki praviadzie aerafotazdymku. Pra heta paviedamili na pradpryjemstvie «Minskija ciepłavyja sietki».

Fota ilustracyjnaje

Zdymki buduć rabić z dapamohaj śpiecyjalnaha ciepłavizijnaha abstalavańnia. Viertalot budzie znachodzicca na vyšyni prykładna 500—600 mietraŭ. Paloty płanujuć pravodzić u viačerni i načny čas, bo dniom transpart i praca pradpryjemstvaŭ mohuć pieraškadžać dakładna vyjaŭlać mahčymyja paškodžańni.

Meta takich palotaŭ — znajści ciepłavyja anamalii ŭ miescach, dzie pad ziamloj prachodziać ciepłatrasy. Dziakujučy ciepłavizijnaj zdymcy śpiecyjalisty mohuć vyznačyć mahčymyja paškodžańni trubapravodaŭ, prablemy ź ciepłaizalacyjaj, a taksama miescy, dzie mohuć być zatoplenyja ciepłavyja kamiery i kanały.

U pradpryjemstvie adznačyli, što takija pravierki pravodziacca štohod viasnoj pierad zakančeńniem aciaplalnaha siezona. Heta dapamahaje svoječasova znajści niaspraŭnaści i padrychtavać ciepłavyja sietki da ramontu.

Kamientary da artykuła