Iranskija futbalistki admovilisia śpiavać himn i viartacca na radzimu
Aŭstralijskaja palicyja pieraviała žančyn u biaśpiečnaje miesca.
Fota: Albert Perez/Getty Images
Piać udzielnic žanočaj zbornaj Irana pa futbole atrymali humanitarnyja vizy ŭ Aŭstralii paśla ich vybyvańnia z Kubka Azii, piša Bi-bi-si.
Pavodle słoŭ ministra imihracyi Aŭstralii Toni Biorka, aŭstralijskaja palicyja «pieraviała žančyn u biaśpiečnaje miesca»— astatnim udzielnicam zbornaj Irana taksama prapanavali zastacca ŭ krainie. Učora hazieta Nine pisała, što im udałosia schavacca ad svaich «kurataraŭ».
Na minułym tydni piać futbalistak admovilisia śpiavać nacyjanalny himn pierad matčam z Paŭdniovaj Karejaj.
U Iranie adzin z kamientataraŭ matču abvinavaciŭ kamandu ŭ tym, što jany zdradnicy vajennaha času, i zapatrabavaŭ surovaha pakarańnia.
Aŭstralijskaja prahrama humanitarnych viz pradastaŭlaje pastajannuju abaronu biežancam i ludziam, jakija majuć patrebu ŭ humanitarnaj dapamozie. Uładalniki takich viz mohuć žyć, pracavać i vučycca ŭ krainie, adznačaje Bi-bi-si.
Pra toje, što piać dziaŭčat pakinuli hatel, źviarnulisia pa dapamohu ŭ palicyju i znachodziacca ŭ biaśpiecy, aŭstralijskija ŚMI paviedamili ŭ paniadziełak ranicaj.
Paźniej prezident ZŠA Donald Tramp zaklikaŭ aŭstralijskija ŭłady dać prytułak usioj kamandzie, a jašče praź dźvie hadziny napisaŭ u svajoj sacyjalnaj sietcy Truth Social, što piaci ŭžo akazana dapamoha.
Adnak nie ŭsia kamanda źviarnułasia pa jaje. Pavodle słoŭ Trampa, niekatoryja ličać, što pavinny viarnucca, bo bajacca za biaśpieku svaich siemjaŭ, jakim pahražajuć, kali jany [futbalistki] nie viernucca.
Raniej amierykanski prezident zajaviŭ, što ZŠA prymuć iranskich spartsmienak, kali Aŭstralija admović im u dapamozie.
Situacyja, jakaja ŭźnikła, źviazana z tym, što na radzimie hulcam kamandy i delehacyi, jakaja ich supravadžaje, moža pahražać niebiaśpieka za admovu śpiavać himn Isłamskaj Respubliki pierad pačatkam ich pieršaha matča.
Aściarohi hramadskaści ŭzmacnilisia paśla taho, jak u nastupnych matčach (usiaho zbornaja praviała try sustrečy) dziaŭčaty ŭžo śpiavali himn i rabili patryjatyčnyja žesty. Mahčyma, heta śviedčyć pra toje, što paśla pieršaj hulni im samim, a taksama ich siemjam mahli pahražać raspravaj.