Zaruba ŭ rasijskim sudzie: padatkovaja Kiraŭskaj vobłaści šantažavała bahacieńkuju «dačku» «Biełarusnafty» bankructvam
Naprykancy 2025 hoda padatkaviki Kiraŭskaj vobłaści Rasii nakiravali ŭ Arbitražny sud Maskvy zajavu ab pryznańni bankrutam kampanii «Janhpur» — supierbahataj rasijskaj dački «Biełarusnafty», jakaja zajmajecca zdabyčaj nafty i haza ŭ Rasii. Jak akazałasia, pytańnie było ŭ doŭhu na $19 tysiač. Adnak sud spyniŭ marazm.
AT «Naftavaja kampanija «Janhpur» — daččynaja kampanija «Biełarusnafty», jakaja z 2013 hoda viadzie raźviedku i zdabyču nafty i haza na terytoryi Jamała-Nienieckaj aŭtanomnaj akruhi Rasii.
U studzieni 2026 hoda kampanija trapiła ŭ dziŭnyja zahałoŭki rasijskich ŚMI, joj pradkazvali bankructva. Usio tamu, što ŭ Maskoŭskim arbitražnym sudzie źjaviłasia sprava ab pryznańni «Janhpura» bankrutam pa patrabavańni padatkovaj słužby Kiraŭskaj vobłaści.
Ofis «Janhpura», fota: skrynšot YouTube
Apošni sud pa spravie adbyŭsia 3 sakavika. U vyniku akazałasia, što nijakaj havorki pra bankructva «Janhpura» — kampanii z hadavoj vyručkaj kala 330 miljonaŭ dalaraŭ — nie idzie.
Nasamreč Kiraŭskaja padatkovaja vyrašyła takim aryhinalnym čynam padšturchnuć «Janhpur» da spłaty doŭha pamieram kala 19 tysiač dalaraŭ.
Zajava ab pryznańni «Janhpura» bankrutam była padadziena ŭ sud 26 śniežnia 2025 hoda. U pačatku studzienia sud pryniaŭ zajavu. Z taho času baki pierakinulisia niekalkimi chadajnictvami da suda.
Kiraŭskaja padatkovaja apošnim arhumientam prasiła sud pryznačyć arbitražnaha kiraŭnika, to-bok čałavieka, jaki pa pryznačeńni suda biare na siabie kiravańnie kampanijaj-daŭžnikom, a taksama pravodzić acenku majomaści i raspradaje jaje dla pahašeńnia daŭhoŭ.
U toj ža samy čas vałavy prybytak «Janhpura» za apošni viadomy hod (2024) skłaŭ kala 94 miljonaŭ dalaraŭ. Inšymi słovami, było jasna, što kampanija prosta nie pahadžajecca z naličanym padatkam.
U vyniku adšukać 19 tysiač dalaraŭ, kab uhamanić jurystaŭ Kiraŭskaj padatkovaj, usio ž pryjšłosia. Jany adklikali zajavu, a na sud nie źjavilisia.
«Pradstaŭnik daŭžnika ŭkazaŭ, što zapazyčanaść pierad paŭnamocnym orhanam pahašana ŭ poŭnym abjomie. Pradstaŭnik zajaŭnika na pasiadžeńnie nie źjaviŭsia […] Sud vyznačyŭ: pryniać admovu UFPS Rasii pa Kiraŭskaj vobłaści ad zajavy ab pryznańni bankrutam AT «NK «JANHPUR». Spynić vytvorčaść pa spravie», — havorycca ŭ pastanovie Maskoŭskaha arbitražnaha suda.