Zatrymali žonku žychara Słonima, jaki skardziŭsia na cisk z boku siłavikoŭ
Mužčyna ŭ sacsietkach raskazaŭ, što siłaviki praśledujuć jaho siamju za łajk 10‑hadovaj daŭniny — 2016 hoda. Ciapier praŭładnyja kanały napisali pra zatrymańnie jaho žonki.
Pavodle słoŭ mužčyny, jaki skardziŭsia ŭ sacsietkach na cisk z boku siłavikoŭ, adziny łajk u sacsietcy «Adnakłaśniki» byŭ pastaŭleny pad fota Alaksandra Łukašenki jašče ŭ 2016 hodzie.
Mužčyna kaža, što nie viedaje, skul toj łajk — noŭtbuk zaŭsiody byŭ adkryty, i knopku «kłas» mahło vypadkova nacisnuć dzicia, jakomu na toj momant było ŭsiaho 5—6 hadoŭ.
Adnak siłavikoŭ dovady pra ŭzrost i vypadkovaść nie spynili. Jany adkazali, raspaviadaje mužčyna, što i dzicia paśla paŭnalećcia mohuć pryciahnuć da adkaznaści.
Ciapier telehram-kanał siłavikoŭ napisaŭ, što žonka mužčyny zatrymanaja i znachodzicca ŭ IČU — tam jana čakaje suda pavodle administracyjny spravy. Śćviardžajecca, što ŭ žančyny znajšli «ekstremisckija padpiski».
«Upeŭnienyja, historyja nie skončanaja», — pahražajuć siłaviki.
Mužčyna raspaviadaŭ u rolikach, što jaho žonka pracuje ŭ taksi, a taksama što jany vychoŭvajuć pryjomnych dziaciej. Dziaciej pahražajuć adabrać.