Atrad śpiecnaza «Buran» pieraŭtvorany ŭ asobnuju vajskovuju častku
Pra heta padčas sustrečy z žurnalistami, prymierkavanaj da Dnia ŭnutranych vojskaŭ, paviedamiŭ namieśnik ministra ŭnutranych spraŭ — kamandujučy ŭnutranymi vojskami Mikałaj Karpiankoŭ, piša BiełTA.
Fota: progomel.by
Pa słovach Karpiankova, try hady tamu ministram unutranych spraŭ byŭ zrobleny akcent na raźvićci padraździaleńniaŭ śpiecyjalnaha pryznačeńnia ŭnutranych vojskaŭ, i nibyta 13 dziejnych atradaŭ paśpiachova zatrymlivajuć «niebiaśpiečnych złačyncaŭ i ekstremistaŭ».
«U minułym hodzie my pavialičvali našy atrady. Asobnyja my pieraŭtvarali ŭ vajskovyja častki. Tak, atrad «Buran» u Homielskaj vobłaści niadaŭna byŭ pieraŭtvorany ŭ vajskovuju častku. Joj prysvojeny numar 3033», — adznačyŭ Karpiankoŭ.
Jon taksama dadaŭ, što ŭ bližejšy čas atrad śpiecyjalnaha pryznačeńnia «Štorm» u Bresckaj vobłaści taksama budzie pieraŭtvorany ŭ vajskovuju častku. Akramia taho, staličnaja vajskovaja častka 5448 budzie pieraŭtvorana ŭ častku apieratyŭnaha pryznačeńnia, a v/č 3310 ź Minskaj vobłaści — u bryhadu śpiecyjalnaha pryznačeńnia.
Jon taksama adznačyŭ, što bajavy patencyjał atradaŭ śpiecyjalnaha pryznačeńnia byŭ istotna pavialičany.
«Jany atrymali na ŭzbrajeńnie novuju zbroju: hranatamioty, PTRK, ahniamioty, kulamioty vialikaha kalibru, BTR-82, a taksama novyja bieśpiłotnyja latalnyja aparaty, jakim my nadavali vielmi vialikuju ŭvahu ŭ minułym hodzie. U nas stvorany try centry bieśpiłotnaj latalnaj avijacyi. I zaraz budzie stvaracca čaćviorty centr u atradzie śpiecyjalnaha pryznačeńnia «Buran» u Homielskaj vobłaści», — dadaŭ Mikałaj Karpiankoŭ.