Samaja darahaja hitara ŭ śviecie. «Čorny Stratocaster» Devida Hiłmara z Pink Floyd pradadzieny za $14,6 młn
Siarod łotaŭ byli jašče niekalki muzyčnych instrumientaŭ, jakija naležali rok-zorkam.
Fota: MJ Kim/Getty Images
Aŭkcyjonny dom Christie's paviedamiŭ, što znakamitaja elektrahitara, jakuju Devid Hiłmar vykarystoŭvaŭ padčas zapisu ŭsich albomaŭ hurta Pink Floyd z 1970 pa 1983 hod, była pradadziena za rekordnuju sumu 14,6 młn dalaraŭ, piša Bi-bi-si.
Takim čynam, hitara, viadomaja jak «Čorny Stratocaster», stała samaj darahoj z usich kali-niebudź pradadzienych u śviecie. Pra toje, chto staŭ pakupnikom, nie paviedamlajecca.
Hetu hitaru možna pačuć na samych papularnych zapisach Pink Floyd, u tym liku na albomach The Dark Side of the Moon, Wish You Were Here i The Wall.
Christie's prahnazavaŭ, što Fender Stratocaster Hiłmara budzie pradadzieny za sumu ad dvuch da čatyroch miljonaŭ dalaraŭ.
Da hetaha samaj darahoj hitaraj śvietu ličyŭsia elektraakustyčny «Martin D-18E», vypuščany ŭ 1959 hodzie i jaki vykarystoŭvaŭsia lidaram hurta «Nirvana» Kurtam Kabiejnam na znakamitym kancercie MTV Unplugged u 1993 hodzie.
Hetaja hitara była pradadziena z aŭkcyjonu ŭ 2020 hodzie za 6 młn dalaraŭ.
Na hetym aŭkcyjonie była taksama pradadziena jašče adna hitara Kurta Kabiejna — sini Fender Mustang, jaki lidar «Nirvany» vykarystoŭvaŭ padčas zapisu videaklipa dla pieśni «Smells Like Teen Spirit» — jaje košt skłaŭ 6,9 młn dalaraŭ.
Instrumienty byli pradadzieny ŭ ramkach tarhoŭ, na jakich vystaŭlałasia majomaść amierykanskaha miljardera Džyma Irsieja, jaki pamior u 2025 hodzie.
Siarod łotaŭ byli jašče niekalki muzyčnych instrumientaŭ, jakija naležali rok-zorkam.
U tym liku za 3,2 młn dalaraŭ pradadziena pijanina Džona Lenana — ličycca, što heta samaja vialikaja suma, kali-niebudź zapłačanaja za pradmiet, źviazany z hurtom «Bitłz».
«Paśla kožnaha łota ŭ nas uźnikała adčuvańnie, što adbyvajucca histaryčnyja padziei», — skazaŭ kiraŭnik amierykanskaha padraździaleńnia Christie's Džulijan Pradełs.
U liku inšych pradadzienych pradmietaŭ:
- Elektrahitara, zroblenaja śpiecyjalna dla vakalista i hitarysta amierykanskaha hurta Grateful Dead Džery Harsii. Instrumient, viadomy jak «Tyhr», kupleny za 11,6 młn dalaraŭ.
- Napisany Bobam Dyłanam ad ruki tekst pieśni «The Times They Are A-Changin» — 2,5 młn.
- Udarnaja ŭstanoŭka, jakaja naležała ŭdarniku «Bitłz» Rynha Staru, — 2,4 młn
- Truba lehiendarnaha džazavaha muzykanta Majłza Devisa — 1,6 młn
- Błaknot z napisanym Silviestram Stałonie ad ruki scenaryjem dla filma «Roki» — 508 tysiač.
- Chałat, u jakim vychodziŭ na ŭzvažvańnie lehiendarny baksior Machamied Ali, — 444,5 tys.
Pavodle źviestak Christie's, ahulny košt 44 vystaŭlenych na tarhi pradmietaŭ z kalekcyi Irsieja skłaŭ 84 młn dalaraŭ.