U Minskim zaaparku pračnułasia para miadźviedziaŭ i viaduć aktyŭnaje žyćcio
U hetym hodzie miadźviedzi dobra vyspalisia.
U Minskim zaaparku pračnułasia para burych miadźviedziaŭ — Trystan i Niura. Pra heta BiełTA paviedamiła małodšaja navukovaja supracoŭnica zaaparka Taćciana Sołtysava.
Taćciana Sołtysava nahadała, što śpiačka ŭ miadźviedziaŭ — heta naturalny i nieabchodny fizijałahičny praces, jaki rehulujecca ŭmovami nadvorja. Pry pieršym surjoznym paciapleńni miadźviedzi Minskaha zaaparka pračnulisia, i heta adbyłosia prykładna ŭ siaredzinie lutaha.
Jana raskazała, što ŭ hetym hodzie miadźviedzi dobra vyspalisia. «Naš darosły miadźviedź Trystan loh u śpiačku jašče da Novaha hoda. Maładaja miadźviedzica Niura, jakaja zvyčajna ihnaruje hety praces, u hetym hodzie dziakujučy mocnym marozam i śniehapadam usio ž lahła spać, ale tolki ŭ pačatku studzienia, paśla Novaha hoda», — adznačyła Taćciana Sołtysava.
Małodšaja navukovaja supracoŭnica patłumačyła, što vychad sa śpiački dla miadźviedziaŭ — pastupovy praces.
«Spačatku miadźviedź stanovicca bolš aktyŭnym i pačynaje varočacca, ale nie pakidaje biarłohu. Kali znoŭ udaryć choład, jon moža navat znoŭ lehčy spać. Tamu isnuje prykmieta: kali miadźviedź pakinuŭ biarłoh, surjoznych marazoŭ užo nie varta čakać. Tak zdaryłasia i ŭ našym vypadku: kali našy supracoŭniki ŭbačyli, što miadźviedzi pačali vychodzić ź bierłahu, stała zrazumieła, što surjoznych marazoŭ bolš nie pradbačycca», — adznačyła jana.
Taćciana Sołtysava dadała, što paśla śpiački miadźviedzi značna schudnieli i ciapier im treba pastupova viartacca da zvyčajnaha žyćcia i racyjonu. Zvyčajny racyjon miadźviedzia składaje kala 18 kiłahramaŭ ježy, ale paśla śpiački heta ŭsiaho kala kiłahrama. U pieršyja dni im starajucca davać białkovuju ježu: šmat arechaŭ, varanaje miasa i rybu, a taksama sadavinu i harodninu. «Pastupova racyjon pavialičvajecca, i miadźviedzi stanoviacca ŭsio bolš aktyŭnymi», — dadała jana.
Sołtysava padkreśliła, što siońnia Trystan i Niura ŭžo viaduć aktyŭnaje žyćcio, i naviedvalniki zaaparka mohuć nazirać za imi ŭ ich valjerach.