Muzyka Illa Čarapko-Samachvałaŭ raskazaŭ pra svaje płany paśla sychodu z «Piatli prychilnaści»
U muzycy jon zastaniecca.
Illa Čarapko-Samachvałaŭ. Fota: instahram @ilyachs
Akcior, vakalist hrupy «Kasijapieja» i ŭ minułym lidar «Piatli prychilnaści» Illa Čarapko-Samachvałaŭ raspavioŭ u instahramie pra svaje płany.
«Płany prostyja: najbližejšyja miesiacy dapracoŭvajem novy albom [hrupy] Polyn. Paralelna chočam zapisać pieraasensavany albom maich starych piesień. Akramia hetaha, idzie praca ŭ «Kasijapiei». Nu, a paśla ja maju namier užo ščylna, a nie ŭryŭkami, jak ciapier, zaniacca svaim solnym prajektam. Pastaviŭ sabie dedłajn na nastupny hod», — padzialiŭsia muzyka.
Nahadajem, u kancy 2025 hoda post-pank hurt «Piatla prychilnaści» adyhraŭ svoj apošni mižnarodny tur. Finalnym jon staŭ, bo vakalist Illa Čarapko-Samachvałaŭ syšoŭ z kalektyvu, historyja jakoha ciahnułasia z 2004 hoda. Jon patłumačyŭ svaju matyvacyju žadańniem ruchacca dalej.
Nichto z astatnich udzielnikaŭ hrupy na siońnia nie źbirajecca adradžać «Piatlu prychilnaści» ŭ novym składzie ci inšym farmacie. Hurt sapraŭdy spyniŭ svajo isnavańnie.