U Biełarusi pradajuć unikalny 47‑hadovy BMW 5‑sieryi — časoŭ Mašerava. Cana — $25 tysiač
U Biełarusi ŭ prodažy ŭsiaho try «piaciorki» hetaha pakaleńnia.
Fota: drive2.ru karystalnika antonn-1980
Z 2014 hoda ŭ adnych rukach
Piaciorka ŭ kuzavie E12 — heta pieršaje pakaleńnie BMW 5-sieryi. Madel vypuskałasia z 1972 pa 1981 hod. Mašyna, jakuju pradajuć u Minsku, 1979 hoda vypusku, to-bok užo restajlinhavaja.
Pad kapotam u hetaj 525‑j bienzinavy mator abjomam 2,5 litra mahutnaściu 150 k. s., što dla kanca 1970‑ch davoli šmat. Pracuje jon u pary z AKPP.
Fota: skrynšot z sajta av.by
Prosiać za mašynu 25 200 dalaraŭ. Źniešnie vyhladaje jana vielmi prystojna, ale apisańnie ŭ abjavie adsutničaje. Praŭda, daviedacca pra historyju hetaha aŭto nie składana, bo pradaviec aktyŭna vioŭ bartavy žurnał na sajcie drive2.ru.
Fota: av.by
U ciapierašniaha ŭłaśnika hetaja mašyna ź leta 2014 hoda. I ź pieršych publikacyj stanovicca zrazumieła, što pierad nami nie kapsuła času, a zvyčajnaja staraja BMW, jakuju biełaruski entuzijast staranna adnaŭlaŭ svaimi rukami. Pryčym patraciŭ na heta nie adzin hod.
Fota: skrynšot z sajta drive2.ru
«Ź pieršaha pohladu mašynka była dahledžanaja i dastatkovaja kamplektnaja, ale paśla razborki vyśvietliłasia, što budzie nad čym papracavać», — takimi byli pieršyja ŭražańni ŭłaśnika ad nabytaha aŭto.
Tak mašyna vyhladała paśla razborki. Fota: drive2.ru karystalnika antonn-1980
Kab adrestaŭravać aŭtamabil, jaho razabrali da apošniaha vincika.
Tak mašyna vyhladała ŭžo paśla restaŭracyi. Fota: drive2.ru karystalnika antonn-1980
Prajekt daŭžynioju 10+ hadoŭ
Z bartavoha žurnała dakładna nie zrazumieła, kolki hadoŭ niaspynnaj pracy pajšło na restaŭracyju, ale viadoma, što ad pačatku da pieršaha vyjezdu ŭ śviet prajšło bolš 10 hod.
Praz dva hady paśla kupli, letam 2016 hoda, kuzaŭ užo byŭ pafarbavany, ale całkam hoły.
Fota: skrynšot z sajta drive2.ru
Tolki ŭ lutym 2025 hoda ŭ bortžurnale aŭto źjaviłasia čarhovaja spravazdača, dzie havaryłasia pra zaviaršeńnie zborki ruchavika i čakańnie ciopłaha siezonu, kab pakatacca na retra-BMW.
Užo ŭ krasaviku 2025 hoda ŭłaśnik spravazdačyŭsia, što aŭto prajechała pieršyja 500 kiłamietraŭ, a ŭžo letam minułaha hoda mašyna ŭpieršyniu ŭdzielničała ŭ retra-vystavie.
Fota: drive2.ru karystalnika antonn-1980
Ciapier ža čałaviek, jaki patraciŭ bolš za 10 hadoŭ na adnaŭleńnie aŭto, vystaviŭ jaho na prodaž.