Biełarusam prapanavali paspytać manhastany
U biełaruskija kramy zavieźli ekzatyčnuju sadavinu — manhastan. Jaho zaŭvažyli ŭ adnym z supiermarkietaŭ u Žłobinie. Cana, praŭda, akazałasia vielmi kuślivaj — kala 74,99 rubla za kiłahram, piša Tochka.by.
Fota: Art Rachen / Unsplash.com
Niekatoryja pakupniki pryznalisia, što bačać takoje ŭpieršyniu. U internecie ludzi dzielacca roznymi ŭražańniami: adnyja kažuć, što smak im nie vielmi spadabaŭsia i heta «hrošy na viecier», inšyja paraŭnoŭvajuć manhastan ź ličy abo adznačajuć, što jaho čaściej kuplajuć «dla fota ŭ instahram» ci dla smuzi.
Manhastan — trapičnaja sadavina z Paŭdniova-Uschodniaj Azii, u Žłobin jaho zavieźli ź Indaniezii. Jon maje ciomna-fijaletavuju amal čornuju ščylnuju łupinu, a ŭnutry znachodzicca biełaja sakavitaja miakać, padzielenaja na dolki, padobnyja da mandaryna. Smak zvyčajna sałodki abo sałodka-kisły.
Frukt ličycca karysnym, bo źmiaščaje vitaminy i antyaksidanty. Jaho jaduć śviežym, dadajuć u sałaty, desierty, soki i kaktejli.
Raniej u adnym ź minskich supiermarkietaŭ taksama źjaviŭsia jašče adzin ekzatyčny frukt — piepina, jaki jašče nazyvajuć «dynnaj hrušaj». Jon kaštuje kala 45,99 rubla za kiłahram i pa smaku nahadvaje sumieś dyni, hrušy i trapičnaj sadaviny.
Čytajcie taksama:
U kramy Minska zavieźli piepina
Biełaruska znajšła ŭ kramie redki płod, ale jaho nasieńnie znajomaje kožnamu