ZŠA patrabujuć adstaŭki prezidenta Kuby
U chodzie pieramoŭ amierykanski bok daŭ zrazumieć Kubie, što prezident krainy pavinien syści, ale dalejšyja kroki amierykancy pakidajuć na mierkavańnie kubincaŭ.
Mihiel Dyjas-Kaniel. Fota: Emilio Flores/Anadolu via Getty Images
Administracyja Donalda Trampa damahajecca adchileńnia ad ułady prezidenta Kuby Mihiela Dyjasa-Kaniela, paviedamiła The New York Times sa spasyłkaj na čatyry krynicy.
U chodzie pieramoŭ amierykanski bok daŭ zrazumieć Kubie, što prezident krainy pavinien syści, ale dalejšyja kroki amierykancy pakidajuć na mierkavańnie kubincaŭ. Na dumku čynoŭnikaŭ z administracyi Trampa, skidańnie Dyjasa-Kaniela dazvolić ažyćciavić na Kubie strukturnyja ekanamičnyja reformy, jakija naŭrad ci padtrymaje ciapierašni prezident.
Adzin z surazmoŭcaŭ NYT raspavioŭ, što Vašynhton taksama choča, kab Kuba pahadziłasia adchilić ad ułady niekatorych padžyłych čynoŭnikaŭ, jakija pa-raniejšamu addanyja idejam Fidela Kastra.
Sa słoŭ krynicy haziety, skidańnie prezidenta Kuby stała b dla Donalda Trampa «simvaličnaj pieramohaj, jakaja dazvoliła b jamu zajavić, što jon zrynuŭ lidara levaha ŭrada, jaki doŭhi čas vystupaje suprać ZŠA — jak heta było zroblena ŭ Vieniesuele».
65‑hadovy Mihiel Dyjas-Kaniel kiruje Kubaj jak prezident z kastryčnika 2019 hoda, jon taksama staršynia Kampartyi Kuby. Jon źmianiŭ na hetaj pasadzie Raula Kastra ŭ 2021 hodzie. Raul Kastra ŭznačalvaŭ kampartyju z 2011 da 2021 hoda. Pierad hetym Kubaj kiravaŭ Fidel Kastra.