Zachop zakładnika i katavańni: u Zakapane buduć sudzić biełarusa za vykradańnie čałavieka
Prakuratura horada Zakapane nakiravała ŭ sud kryminalnuju spravu ŭ dačynieńni da biełarusa i palaka, jakich abvinavačvajuć u vykradańni i žorstkim katavańni 24‑hadovaha chłopca. Pavodle śledstva, u vieraśni 2025 hoda złačyncy vykrali jaho i žorstka ździekavalisia, sprabujučy atrymać hrošy.
Pavodle polskaj prakuratury, paciarpiełaha trymali ŭ padvale adnaho z budynkaŭ u Zakapane, dzie jaho źbivali, zatykali rot klapam i prykoŭvali kajdankami da trub aciapleńnia. Paźniej vykradalniki pačali vazić svaju achviaru pa roznych haradach Polščy, u tym liku ŭ Hdańsk i Hdyniu. Jany patrabavali ad siamji chłopca vykup.
Vyratavacca maładzionu ŭdałosia tolki dziakujučy vypadku: skarystaŭšysia niaŭvažlivaściu złačyncaŭ, jon zmoh adpravić maci paviedamleńnie, paśla čaho žančyna źviarnułasia ŭ palicyju.
Padčas zatrymańnia ŭ aŭtamabili padazravanych — 36‑hadovaha biełarusa Alaksieja T. i 30‑hadovaha palaka Adryjana S. — pravaachoŭniki znajšli ceły nabor: ahniastrelnuju zbroju, narkotyki, płastykavyja ściažki, jakimi źviazvali ruki achviary.
Akramia asnoŭnaha abvinavačvańnia ŭ zachopie zakładnika, biełarusu inkryminujuć niezakonnaje vałodańnie zbrojaj, a jaho saŭdzielniku — zachoŭvańnie psichatropnych rečyvaŭ.
Zaraz abodva abvinavačanyja znachodziacca pad vartaj. Zhodna z polskim zakanadaŭstvam, za zachop zakładnika, źviazany z asablivymi pakutami, im pahražaje surovaje pakarańnie — ad 5 da 25 hadoŭ pazbaŭleńnia voli.