Na vučeńni palicyi ŭ akupavanaj Hołaj Prystani prylacieŭ dron — piaciora zahinułych

Kali praz paŭhadziny pryjechaŭ načalnik, paŭtornym udaram paraniła i jaho, paviedamlaje telehram-kanał «Dośje špiona».

Fota ilustracyjnaje

28 lutaha 2026 hoda pa palihonie MUS RF kala nasielenaha punkta Łazurnaje ŭ akupavanaj Chiersonskaj vobłaści byŭ naniesieny ŭdar ukrainskaha bieśpiłotnika.

U vyniku zahinuli piać supracoŭnikaŭ palicyi ŭ zvańniach ad majora da lejtenanta, jašče šeść atrymali ranieńni. Usie jany byli nie miascovyja, raniej słužyli ŭ Maskvie, Jarasłaŭli, Kiravie, Chanty-Mansijsku, Tatarstanie, Adyhiei, Amurskaj i Śviardłoŭskaj abłaściach.

Na toj momant na palihonie prachodzili vučebnyja strelby dla supracoŭnikaŭ adździeła ŭnutranych spraŭ «Hołaja Prystań».

Padčas pieršaha ŭdaru zahinuli piać aficeraŭ. Jašče niekalki čałaviek byli paranienyja, u tym liku kiraŭnictva i supracoŭniki taho ž adździeła.

Praz paŭhadziny paśla zdareńnia na miesca prybyŭ sam načalnik adździeła Alaksandr Ščahłoŭ. U hety momant byŭ naniesieny paŭtorny ŭdar bieśpiłotnika. U vyniku načalnik atrymaŭ ciažkija askołačnyja ranieńni žyvata i noh.

Taksama paviedamlajecca, što paciarpieŭ 11‑hadovy syn adnaho z namieśnikaŭ načalnika — jon atrymaŭ ciažkaje ranieńnie skivicy.

Siarod zahinułych padčas hetaj ataki zhadvajecca Vieranika Vielmamiedava — lejtenant, inśpiektar adździeła MUS «Hołaja prystań», jakaja pryjechała na akupavanyja terytoryi z Chanty-Mansijska. Pry hetym rasijskaja prapahanda pradstaŭlała jaje jak vałanciorku i nastaŭnicu, jakaja dapamahała ŭ vychavańni ŭ rasijskim duchu ŭkrainskich dziaciej.

Viadoma, što jana pryjechała ŭ Chiersonskuju vobłaść u 2023 hodzie ŭ składzie «piedahahičnaha desantu», pracavała nastaŭnicaj u siale Žalezny Port, a paśla ŭładkavałasia na pracu ŭ palicyju. Na pachavalnych fota jana vyjaŭlenaja ŭžo ŭ palicejskaj formie.

Vieranika Vielmamiedava

Kamientary da artykuła