Pamior Siarhiej Maksimienka
16 sakavika raptoŭna pamior viadomy biełaruski fizik-jadzierščyk, dyrektar Instytuta jadziernych prablem BDU Siarhiej Maksimienka. Jamu byŭ 71 hod.
Siarhiej Maksimienka
Siarhiej Maksimienka naradziŭsia 13 žniŭnia 1954 hoda ŭ haradskim pasiołku Kryvičy Miadzielskaha rajona. U 1976 hodzie skončyŭ fizičny fakultet BDU. Z 1986 hoda pracavaŭ u Instytucie jadziernych prablem BDU, u 1996‑m staŭ doktaram fizika-matematyčnych navuk.
U 1997—2000 hadach byŭ namieśnikam dyrektara pa navukovaj rabocie, u 2000—2005 — namieśnikam prarektara pa navucy BDU. U 1992—2012 hadach kiravaŭ łabaratoryjaj elektradynamiki nieadnarodnych asiarodździaŭ. Z 2013 hoda byŭ dyrektaram Instytuta jadziernych prablem BDU. Taksama byŭ členam ahulnaha schodu NAN Biełarusi i ekśpiertnaj rady Vyšejšaj atestacyjnaj kamisii Respubliki Biełaruś.
Navukovaja dziejnaść Maksimienki była skancentravanaja na elektramahnietyźmie, nanastrukturach i ŭzajemadziejańni elektramahnitnaha vypramieńvańnia z materyjałam. Jon źjaŭlaŭsia aŭtaram bolš za 280 publikacyj, u tym liku manahrafij i artykułaŭ u viadomych navukovych časopisach. Byŭ členam praŭleńnia Biełaruskaha fizičnaha tavarystva, Jeŭrapiejskaha tavarystva materyjałaznaŭcaŭ i Mižnarodnaha tavarystva aptyčnych inžynieraŭ, namieśnikam hałoŭnaha redaktara časopisa Journal of Nanophotonics. U 2025 hodzie jamu było prysvojena hanarovaje zvańnie Zasłužanaha dziejača navuki Biełarusi.
Pad jaho kiraŭnictvam pravodzilisia daśledavańni ŭ halinie nanastruktur, nanatrubak i paŭpravadnikovych hieterastruktur, što pryviało da raźvićcia novaj dyscypliny — nanaelektramahnietyzmu.
Raźvitańnie ź Siarhiejem Maksimienkam adbudziecca 19 sakavika (čaćvier) pa adrasie: Minsk, vuł. Alšeŭskaha, 12. Pačatak — 12:30.