Tramp zaklikaŭ Iran i Izrail spynić udary pa naftahazavych radoviščach
Prezident ZŠA zajaviŭ, što Vašynhton nie viedaŭ pra padrychtoŭku ataki i zabaraniŭ Izrailu nanosić novyja ŭdary pa «Paŭdniovym Parsie».
Fota: Alex Brandon / AP
Prezident ZŠA paśla skačka koštaŭ na naftu Brent da $118 zaklikaŭ spynić udary pa enierhietyčnaj infrastruktury Blizkaha Uschodu. Pra heta jon zajaviŭ u svaim błohu paśla taho, jak 18 sakavika Izrail nanios udar pa najbujniejšym hazavym radoviščy Irana — «Paŭdniovy Pars», a Iran pačaŭ ataki ŭ adkaz na najbujniejšyja zavody Saudaŭskaj Aravii i Katara.
Krynicy vydańnia The Wall Street Journal śćviardžajuć, što prezident ZŠA byŭ zahadzia apavieščany pra apieracyju i padtrymaŭ jaje jak «pasłańnie» Tehieranu ŭ suviazi ź pierakryćciem Armuzskaha praliva
Pry hetym sam Tramp u błohu zajaviŭ, što Vašynhton nie viedaŭ pra padrychtoŭku ataki i «zabaraniŭ» Izrailu nanosić novyja ŭdary pa «Paŭdniovym Parsie».
«Na žal, Iran nie viedaŭ pra heta i nieabhruntavana i niespraviadliva atakavaŭ Katar», — zajaviŭ jon.
Tramp taksama papiaredziŭ, što ŭ vypadku novych atak z boku Tehierana ZŠA hatovy nanieści novy ŭdar pa «Paŭdniovym Parsie», i radovišča moža być «poŭnaściu źniščana».
Iran u adkaz atakavaŭ pramysłovy horad Ras-Łafan u Katary, dzie raźmieščany najbujniejšy ŭ śviecie kompleks pa vytvorčaści zvadkavanaha pryrodnaha hazu. Hety kompleks zabiaśpiečvaje kala piataj častki suśvietnych pastavak SPH. U kampanii Qatar Energy paviedamili pra «istotnuju škodu» abjektam. Na pačatku sakavika pradpryjemstva ŭžo prypyniała pracu z-za atak Korpusa vartavych isłamskaj revalucyi.